Latviya Respublikasının 107 illiyi münasibətilə Bakıda rəsmi qəbul keçirilib
Latviya Respublikasının elan olunmasının 107-ci ildönümü münasibətilə noyabrın 20-də Bakıda rəsmi qəbul təşkil edilib.
Crossmedia.az xəbər verir ki, rəsmi qəbulda əvvəlcə Azərbaycanın və Latviyanın Dövlət himnləri səsləndirilib.
Daha sonra Latviyanın Azərbaycandakı səfiri Edqars Skuya çıxışında Azərbaycan-Ermənistan sülh prosesində əldə olunan irəliləyişi yüksək qiymətləndirib, Cənubi Qafqazda sülhün iqtisadi inkişaf üçün önəmli olduğunu vurğulayıb və ölkəmizin regionda strateji rolunu qeyd edib.
O, iki ölkə arasında strateji tərəfdaşlıq, yüksəksəviyyəli görüşlər və kənd təsərrüfatı, yaşıl texnologiyalar, üzvi əkinçilik kimi sahələrdə əməkdaşlıq perspektivlərindən danışıb.
Azərbaycanın kənd təsərrüfatı naziri Məcnun Məmmədov bildirib ki, Azərbaycan və Latviya arasında münasibətlər qarşılıqlı hörmətə əsaslanır, indiyədək 47 sənəd imzalanıb, 6 sənəd layihəsi isə baxılma mərhələsindədir. O, hökumətlərarası komissiyanın fəaliyyəti, parlamentlərarası əlaqələr və beynəlxalq təşkilatlar çərçivəsində qarşılıqlı dəstəyin münasibətlərin inkişafında mühüm rol oynadığını vurğulayıb.
Tədbirdə dövlət və hökumət rəsmiləri, ölkəmizdə akkreditə olunmuş diplomatik korpusun nümayəndələri iştirak ediblər.
22:30 20.11.2025
Oxunuş sayı: 1270
