Cənubi Qafqazda sülh iqtisadi inkişafa da səbəb olacaq- Parlamentari
Cənubi Qafqaz regionunda sülh və iqtisadi əməkdaşlıq məsələləri regional inkişafın əsas prioritetlərindən biri kimi diqqət mərkəzindədir. Ermənistan və Azərbaycan arasında sülhün təmin edilməsi və birgə regional layihələrin həyata keçirilməsi yalnız tərəflər arasında münasibətlərin normallaşmasına deyil, eyni zamanda bölgənin logistika və iqtisadi potensialının gücləndirilməsinə də imkan yaradır. Ermənistan Prezidenti Vaaqn Xaçaturyanın Gürcüstan Prezidenti Mixail Kavelaşvili ilə keçirdiyi brifinqdə vurğuladığı kimi, suverenlik və qarşılıqlı hörmət prinsiplərinə əsaslanan əməkdaşlıq Cənubi Qafqazı daha dayanıqlı və inteqrasiya olunmuş bir mərkəzə çevirə bilər. Bu kontekstdə, regionun rifahının təmin edilməsi yalnız dövlətlərin deyil, bütün bölgənin ortaq məsuliyyətinə çevrilir.
Mövzu barədə Crossmedia.az-a danışan Milli Məclisin deputatı Vüqar Bayramov bildirib ki, Cənubi Qafqazda sülhün əldə edilməsi bütövlükdə region iqtisadiyyatının inkişafı baxımından vacibdir:
“Çünki nəticə etibarilə bu, regiona daha çox sərmayə cəlb edilməsinə və iqtisadiyyatın dəstəklənməsinə imkan yaradacaq. Bu baxımdan, təbii ki, sülh nəqliyyat və logistikada da özünü göstərə bilər. Azərbaycan bütövlükdə Orta Dəhlizin genişləndirilməsini dəstəkləyən ölkələrdəndir və praktik olaraq Ələt regional regionu nəqliyyat xabına çevrilməkdədir. Bu kontekstdən Azərbaycanın mövcud imkanlarını istifadə etməklə, Qafqazın bütövlükdə nəqliyyat və logistika sahəsindən faydalanması müşahidə oluna bilər. Davamlı sülhün iqtisadiyyata təsirləri açıq-aydındır və nəticə etibarilə regionda yalnız nəqliyyat-logistika sahəsində deyil, daha çox sərmayə cəlb edilməsi yolu ilə iqtisadi inkişafı dəstəkləyəcək".
Mehriban Yariyeva
20:16 20.11.2025
Oxunuş sayı: 2586
