Gürcüstanın dəstəyi Cənubi Qafqazda dayanıqlı sülh və əməkdaşlığa töhfə verir – Deputat
Cənubi Qafqazda sülh və sabitliyin qorunması həm regional, həm də beynəlxalq səviyyədə prioritet məsələlərdən biridir. Son dövrlərdə Azərbaycan, Ermənistan və Gürcüstan arasında münasibətlərin normallaşdırılması istiqamətində atılan addımlar diqqət çəkir. Xüsusilə Gürcüstan Prezidenti Mixail Kavelaşvilinin erməni həmkarı Vaaqn Xaçaturyanla Tbilisidə görüşü zamanı səsləndirdiyi açıqlamalar göstərir ki, Gürcüstan bölgədə sülh sazişinin paraflanmasını dəstəkləyir və Cənubi Qafqazda sabitliyin qorunmasının vacibliyini vurğulayır. Görüş çərçivəsində ikitərəfli münasibətlər, əməkdaşlıq perspektivləri və regiondakı aktual siyasi məsələlər müzakirə olunmuşdur.
Mövzu ilə bağlı Crossmedia.az-a açıqlama verən Milli Məclisin deputatı Tənzilə Rüstəmxanlı bildirib ki, son zamanlar Gürcüstan rəsmiləri Azərbaycanla Ermənistan arasında sülh prosesi çərçivəsində atılan addımlar, eləcə də Gürcüstanla Azərbaycan arasında strateji tərəfdaşlığın önəminə diqqət yetirməyə başlayıblar: "Bu baxımdan, Gürcüstan Prezidenti Mixail Kavelaşvilinin erməni həmkarı ilə görüşü zamanı Azərbaycan və Ermənistan arasında yaxın gələcəkdə sülh sazişinin imzalanacağına ümidvar olduğunu bildirməsi təsadüfi deyil. Gürcüstanın Ermənistan-Azərbaycan sülh prosesinə dəstəyi Cənubi Qafqazda dayanıqlı sülh və əməkdaşlıq mühitinin formalaşmasına töhfə verir. Bu dialoq region ölkələrinin qarşılıqlı etimadının möhkəmlənməsi üçün mühüm addım hesab oluna bilər".
Deputat əlavə edib ki, son 35 ildə Gürcüstan regionda sülhün təşviqində mühüm rol oynayıb və bu gün də dənizə çıxışı olmayan Ermənistan və Azərbaycan üçün əhəmiyyətli tərəfdaşdır: "Gürcüstanın iki ölkə ilə iqtisadi əməkdaşlığı onların iqtisadi inkişafı üçün həlledici rol oynayır. İki ölkə arasında sülh sazişinin imzalanması siyasi mövqelərin güclənməsi və iqtisadiyyatın inkişafı baxımından da əhəmiyyətlidir. Bu proses, heç şübhəsiz, Cənubi Qafqazda sülhün daha da möhkəmlənməsinə və region ölkələrinin iqtisadi inkişafına mühüm töhfə verəcək".
Mehriban Yariyeva
19:09 20.11.2025
Oxunuş sayı: 1387
