"Qarabağın" qələbələri hər birimizi qürurlandırır - Müsahibə
"Qarabağ" tam mənada Avropa futbolu oynayır-Müsahibə
"Qarabağ""FK-nın UEFA Çempionlar Liqasında göstərdiyi çıxış son illərdə Azərbaycan futbolunun ən böyük uğurlarından biri kimi dəyərləndirilir. Klub ilk dəfə 2017-ci ildə turnirin əsas mərhələsinə yüksələrək Azərbaycan futbol tarixində dönüş nöqtəsi yaratmışdı. Bu nailiyyət "Qarabağın" Avropa arenasında sabit və rəqabətədavamlı komanda kimi formalaşmasının başlanğıcı oldu.
2025/26 mövsümü isə "Qarabağ"ın daha yetkin və inamlı oyun sərgilədiyi, böyük klublar qarşısında çəkinmədən mübarizə apardığı bir mərhələ kimi diqqət çəkir. Komanda səfərdə "Benfikanı" 3:2 hesabı ilə məğlub etməklə Avropada çoxları üçün gözlənilməz, ölkə futbolu üçün isə qürurverici bir nəticə əldə etdi. Ardınca Bakıda Kopenhagenə 2:0 hesabı ilə qalib gəlməsi "Qarabağ"ın təsadüfi komanda olmadığını, oyunun həm taktiki, həm də psixoloji yönünü yüksək səviyyədə idarə etdiyini nümayiş etdirdi.
Bu mövsümün ən yadda qalan oyunlarından biri isə dünya futbolunun nəhəng klublarından olan "Çelsi" ilə keçirilən qarşılaşma oldu. "Qarabağ" London təmsilçisi ilə prinsipial və gərgin mübarizədə 2:2 hesablı bərabərlik əldə etdi. Bu oyun "Qarabağ"ın artıq Avropanın ən güclü komandaları ilə bərabər səviyyədə oynaya bildiyini, meydanda inam, dözüm və taktiki yetkinlik nümayiş etdirdiyini sübut etdi. "Çelsi" kimi nəhəng bir klubdan xal almaq həm komandanın özünəinamını artırdı, həm də beynəlxalq media və futbol ictimaiyyətinin "Qarabağa"baxışını dəyişdirdi.
Bu nəticələr "Qarabağın" UEFA reytinq xallarına əhəmiyyətli təsir göstərməklə yanaşı, Azərbaycan futbolunun nüfuzunu yüksəldib. Klubun turnirdə iştirakı həmçinin ciddi maliyyə gəliri gətirərək infrastrukturun və kadr potensialının daha da inkişafı üçün imkanlar yaradıb.
Nəticə etibarilə, "Qarabağ" FK-nın Çempionlar Liqasındakı uğurlu çıxışı Azərbaycan futbol tarixinə qızıl hərflərlə yazılan bir dövr kimi qəbul olunur. Komandanın böyük rəqiblərlə bərabər oyun sərgiləməsi, qalibiyyətlər qazanması və dünya futbol ictimaiyyətinin diqqətini cəlb etməsi "Qarabağın" təkcə yerli deyil, həm də Avropa miqyasında möhkəmlənməkdə olan bir futbol markasına çevrildiyini göstərir.
"Qarabağ"ımızın uğurları ilə bağlı idman mütəxəssisi, İş Adamlari Cəmiyyəti Milli Assosiasiyasinin üzvü Taleh Nağıyev Crossmedia.az-la öz fikirlərini bölüşüb:
— "Qarabağ" klubunun uğurlu çıxışı ilə bağlı fikirləriniz necədir?
— "Qarabağ" klubunun tarixi oyunlar keçirməsi və əldə etdiyi nəticələr hər birimizi xalq olaraq qürurlandırır. Artıq bütün dünyaya məlum oldu ki, "Qarabağ" hər bir komandaya qarşı ciddi mübarizə aparmağa hazır olan və asanlıqla məğlub olmayan bir komandadır.
— Klubdan növbəti oyunlarda gözləntiləriniz nədir?
— Növbəti oyunda “Napoli” üzərində qələbəyə böyük inamım var. Çünki komanda hər bir nəhəng klubla qarşılaşdıqca daha da təcrübə qazanır və bunun təsirini hər oyunda aydın şəkildə görmək mümkündür.
— Komandamızın növbəti dəfə tarix yazaraq mərhələ adlamasını gözləyə bilərikmi?
— Əlbəttə, buna inanmaq üçün ciddi əsaslar var. "Qarabağ" tam mənada Avropa futbolu oynayır. Komandamız meydanda digər rəqiblərdən daha istəkli və əzmkar təsir bağışlayır.
— Bu nəticələrin Azərbaycan futboluna üstünlüyü nə qədərdir?
— Bu nəticələr təkcə Azərbaycan futbolu üçün deyil, həm də ölkəmizin xarici siyasəti üçün olduqca mühüm amildir.
Elmir Heydərli
19:02 20.11.2025
Oxunuş sayı: 1681
