Hadisə
“Suverenliyin zəfər yolu” kitabı işıq üzü gördü
Hüquq və İnsan Haqları İnstitutunun İdarə Heyəti sədrinin müavini, hüquq üzrə fəlsəfə doktoru Vəfaddin İbayevin “Suverenliyin zəfər yolu: reallaşan ideyalar, hüquqi əsaslar, siyasi paralellər” adlı yeni kitabı nəşr olunub. 466 səhifəlik nəşr müasir Azərbaycan tarixinin ən əlamətdar hadisəsi – dövlət suverenliyinin tam bərpası ilə nəticələnən 44 günlük Vətən müharibəsinə dair geniş elmi-analitik baxışı özündə birləşdirir.
Crossmedia.az xəbər verir ki, kitabda 33 fəsil boyunca Prezident İlham Əliyevin dünya mediasına verdiyi müsahibələr, xalqa müraciətləri və rəsmi çıxışları sistemli şəkildə tədqiq edilir. Burada “Rossiya-1”, “TRT Haber”, “Al-Cazeera”, “CNN International”, “France 24”, “BBC News”, “Fox News”, “La Repubblica”, “Figaro”, “Euronews” kimi nüfuzlu media platformalarına müsahibələr mərhələli şəkildə analiz olunur.
Müəllif kitabda Prezident İlham Əliyevin müsahibələrini təhlil edir. Tədqiqatda Ulu Öndər Heydər Əliyevin və Prezident İlham Əliyevin Azərbaycan-Ermənistan, Dağlıq Qarabağ münaqişəsinin həlli ilə bağlı strateji ideyalarının reallaşma mexanizmləri – ordu quruculuğu, vətənpərvərlik ruhunun yüksəldilməsi, beynəlxalq müstəvidə Azərbaycanın ədalətli mövqeyinin təsdiqi, “bir millət, iki dövlət” münasibətlərinin inkişafı kimi istiqamətlər ayrıca araşdırılır.
Nəşrdə həmçinin İkinci Qarabağ müharibəsinin beynəlxalq hüquq, humanitar hüquq və beynəlxalq cinayət hüququ aspektlərindən qiymətləndirilməsi xüsusi yer tutur. Müəllif Azərbaycan ordusunun hərbi əməliyyatlar zamanı hüquqa uyğun fəaliyyətini elmi əsaslarla izah edir, eyni zamanda müharibə dövründə cinayət törətmiş erməni silahlı birləşmələrinin beynəlxalq məsuliyyət daşımasının zəruriliyini əsaslandırır.
Kitabın ən diqqətçəkən cəhətlərindən biri Prezident İlham Əliyevin çıxışlarında yer alan fikirlərin dünya və tarixin tanınmış hərbi-siyasi liderlərinin – Attila, Yuli Sezar, Çingiz xan, Əmir Teymur, Səlahəddin Əyyubi, Vudro Vilson, Uinston Çörçill, Şarl de Qoll, Mustafa Kamal Atatürk və digərlərinin fəaliyyəti ilə müqayisəli şəkildə təqdim olunmasıdır. Müəllif bu paralelləri Nürnberq prosesinin sənədləri, həmçinin Qurani-Kərimin ayələri və “Kitabi-Dədə Qorqud”un müdrik ideyaları ilə zənginləşdirir.
“Suverenliyin zəfər yolu” 44 günlük müharibənin diplomatik, hüquqi, siyasi və mənəvi aspektlərini dərindən öyrənmək istəyən geniş oxucu kütləsi, tədqiqatçılar, politoloqlar və hüquqşünaslar üçün dəyərli mənbə hesab olunur.
18:08 20.11.2025
Oxunuş sayı: 8448
