Trampla görüşdə təsdiqlənib, Zəngəzur dəhlizi açılacaq - Professor
Bu gün Azərbaycan Memarlıq və İnşaat Universitetində (AzMİU) “Müasir İpək Yolu üzərində türk dövlətlərinin sosial-mədəni inteqrasiya prosesləri: çağırışlar və perspektivlər” mövzusunda beynəlxalq elmi konfrans keçirilib. Tədbir üçmərhələli planlaşdırılıb: ilk mərhələ Azərbaycanda, ikinci mərhələ Türkiyədə, üçüncü isə Özbəkistanda keçiriləcək. Konfransın Azərbaycanda başlaması isə regionda türk dövlətləri arasında inteqrasiyanın gücləndirilməsi və sosial-mədəni əməkdaşlığın önəmini göstərir.
Xəzər Universitetinin təsisçisi, professor Hamlet İsaxanlı tədbirin əsas mahiyyəti ilə bağlı Crossmedia.az-a açıqlama verib:
"Bu gün dünyada iki əsas növ zənginlik var. Onlardan biri yeraltı sərvətlərdir – neft, qaz, uran və digər resurslar. Türk xalqları, o cümlədən Azərbaycan bu sərvətlər baxımından kifayət qədər zəngindir. Məsələn, Qazaxıstan uran ehtiyatlarına görə dünyanın ən zəngin ölkələrindən biridir.
İkinci zənginlik isə strateji yollardır. Çünki dünyada bir çox məsələlər məhz yol və logistika vasitəsilə həll olunur. Hazırda Şərqlə Qərb, yəni Çinlə Avropa arasında üç əsas yol mövcuddur. Rusiya üzərindən keçən şimal yolu, İran üzərindən keçən cənub yolu və Orta Dəhliz. İlk iki yol hazırda effektiv fəaliyyət göstərmədiyi üçün Türk dünyasının, xüsusilə də Azərbaycanın əhəmiyyəti kəskin şəkildə artıb. Çünki Orta Dəhliz məhz bizim ərazimizdən keçir və biz bu yolun mərkəzində yerləşirik".
Professor əlavə edib ki, orta Asiya ölkələri ilə Türkiyə arasında əsas bağlantını Azərbaycan təmin edir: "Bu marşrutda Gürcüstan, Ermənistan və Zəngəzur dəhlizi də mühüm mövqeyə malikdir. Ona görə də bu, bizim üçün strateji üstünlük yaradır.
Yaxın günlərdə ABŞ Prezidenti Donald Trampın əvvəlcə Azərbaycan və Ermənistan rəhbərlərini, daha sonra Orta Asiya ölkələrinin liderlərini qəbul etməsi də Orta Dəhlizin artan əhəmiyyətinin göstəricisidir. 44 günlük müharibədə əldə edilən Zəfər də Zəngəzur dəhlizinin açılması üçün təkan oldu. Bu dəhlizin vacibliyi, mövcudluğu və açılacağı məsələsi Trampın görüşlərində faktiki olaraq təsdiqləndi".
Ayhan
16:50 20.11.2025
Oxunuş sayı: 1236
