Media və QHT
Saytlara dəstək artırılır: Qərar alqışlandı
Medianın İnkişafı Agentliyi (MEDİA) onlayn media subyektlərinə göstərilən maliyyə dəstəyinin məbləğini artırmaqla bu sahənin inkişafına yeni təkan verib. Agentliyin elan etdiyi onlayn media subyektlərinə dəstək müsabiqəsinin yenilənmiş şərtlərinə əsasən, qalib gələn media qurumları ilə imzalanacaq müqavilələr çərçivəsində hər bir subyektə aylıq 5000 manat məbləğində maliyyə yardımı göstəriləcək. Bu dəyişikliklə onlayn medianın keyfiyyətinin, dayanıqlılığının və rəqabət qabiliyyətinin artırılması, eləcə də media mühitində peşəkarlığın dəstəklənməsi hədəflənir. Qeyd edək ki, əvvəlki illərdə bu məbləğ 3000 manat təşkil edirdi. Yeni qərar medianın iqtisadi dayanıqlığını gücləndirmək və rəqəmsal informasiya mühitinin inkişafına töhfə vermək məqsədi daşıyır.
Bu barədə Crossmedia.az-a danışan BDU-nun Jurnalistika fakültəsinin kafedra müdiri, professor Cahangir Məmmədli deyib ki, MEDİA-nın bu təşəbbüsü çox ciddi tədbirdir: “Belə bir fikir söyləyə bilərik ki, tam müstəqil olmaq üçün medianın nə dövlətə, nə də kiməsə ehtiyacı olmamalıdır. Ancaq bizdə reklam səviyyəsi aşağı, reklam bazarımız isə zəifdir. Ona görə də bizim bu kimi yardımlara ehtiyacımız var. MEDİA da bununla əlaqədar olaraq belə bir qərar qəbul edib ki, bu, çox yararlı bir qərardır. Dövlətimizə və Prezidentimizə təşəkkür edirik ki, media subyektlərinə, jurnalistikamıza, media qurumlarına kömək və dəstəyin tərəfdarıdırlar. Bunların da əsas səbəbkarı Prezidentimizdir. Qeyd etdiyim kimi, media subyektləri çalışmalıdırlar ki, inkişafda olsunlar, operativ olsunlar, maraqlı xəbərlər təqdim etsinlər ki, reklam bazarında onların yeri görünsün. Yəqin ki, inkişafımız bu sürətlə davam edərsə, uzağı 5 ildən sonra biz reklam bazarından başqa heç kimə möhtac olmayacağıq. Amma indiki səviyyədə dövlətimizə minnətdarlığımı bildirirəm ki, mənim tələbələrimin də iştirak etdiyi media subyektlərinə dövlət qayğısı var”.
“Yurd media” saytının təsisçisi Murad Əliyev bildirib ki, onlayn media subyektlərinə media dəstəyinin həcminin artılıması ümumilikdə jurnalistikamızın inkilşafına müsbət təsir göstərəcək: “Açıq danışsaq, bu gün 600 manat əməkhaqqına yalnız yeni universiteti bitirən şəxslər işləyər. Bu səbəbdən əməkhaqqının 800 manata qaldırılması real mənzərəyə yaxındır. Arzu edirəm ki, bu son qərar mətbuatın daha da inkişaf etməsinə öz töhfəsini versin, həqiqətən, ictimai fikirə təsir göstərə bilən saytlar bu dəstəkdən yararlansın. Azərbaycanda son dövrlər araşdırma jurnalistikasının, keyfiyyətli təhlillərin sayının az olduğu ilə bağlı tez - tez şikayətlər eşidirik. Dövlət dəstəyinin artırılmasının digər bir müsbət təsiri də bu kimi materialların sayının artmasına rəvac verməsi olacaq”.
“Yeni Sabah” xəbər portalının baş redaktoru İmdad Əlizadə də qərarı alqışlayıb: “Agentliyin onlayn media subyektlərinə ayrılan vəsaiti artırmasını çox yüksək qiymətləndirirəm. Hesab edirəm ki, indiki çətin məqamda bu, jurnalistlərə böyük dəstəkdir. Media subyektlərinə ayrılan vəsait dolayısı ilə həm də jurnalistlərin maaşının artmasına səbəb olacaq. İndiki vəziyyətdə bilirsiniz ki, reklam bazarı çox kasaddır. Böyük şirkətlər mətbuata reklam vermək və ya o istiqamətdə əməkdaşlıq etməkdə xəsislik edirlər. Ona görə də jurnalistlər və media qurumları maddi cəhətdən sıxıntı çəkirlər. Bu sıxıntının aradan qaldırılmasının yollarından biri də dövlətin maliyyə dəstəklərinin artırılmasıdır. İstənilən halda bunu müsbət addım kimi qiymətləndirirəm. Bu, eyni zamanda media quruluşlarının yaşamasına, işini davam etdirməsinə və jurnalistlərin işini itirməməsinə səbəb olacaq bir addımdır. Sosial şəbəkələrdə yazılan şərhlərdən də görürəm ki, jurnalistlər bunu müsbət qiymətləndirirlər. Arzumuz odur ki, mətbuatın maddi təminatı daha da yaxşılaşsın və bu yaxşılaşma istiqamətində atılan istənilən addım dəstəyə layiqdir”.
Zeynəb Xuduyeva
18:58 13.11.2025
Oxunuş sayı: 2926
