Deputat: Bakıda keçirilən hərbi parad bütün Türk dünyası üçün mühüm hadisə idi
Müzəffər Ali Baş Komandan, Prezident İlham Əliyevin rəhbərliyi ilə 44 günlük Vətən müharibəsində qazanılan Qələbənin beşinci ildönümünə həsr olunmuş möhtəşəm Hərbi paradının keçirilməsi Azərbaycanın şanlı Qələbəsinin növbəti əzəmətli və təntənəli nümayişi idi. Bakı şəhərində keçirilən Hərbi parad təkcə Azərbaycan xalqı üçün deyil, bütün Türk dünyası üçün mühüm hadisə oldu. Bu Paradın keçirilməsi Rəşadətli Ordumuzun, Müzəffər Ali Baş Komandan İlham Əliyevin rəhbərliyi ilə qazandığı Böyük Qələbə, müasir müstəqil Azərbaycan dövlətinin hərbi qüdrətinin, iqtisadi gücünün nümayişi ilə yanaşı, xalqımızın qələbə əzminin də növbəti əyani təsdiqidir.
Bu sözləri Bu fikirləri Milli Məclisin Müdafiə, təhlükəsizlik və korrupsiya ilə mübarizə komitəsinin üzvü, deputat Səbinə Salmanova Crossmedia.az-a açıqlamasında deyib.
Deputat Vətən müharibəsində Qələbənin beşinci ildönümünə həsr olunmuş Hərbi paraddan bütün qoşun növlərini əhatə edən hərbçilərlə yanaşı, hərbi texnikaların keçdiyini bildirib:
“Birlik, birləşmə və hərbi hissələrin xüsusi texnikaları və silah sistemlərinin keçidi zamanı nümayiş etdirilən xüsusi təyinatlı avtomobil, zirehli-tank texnikası, hava hücumundan müdafiə, artilleriya və əməliyyat taktiki raket sistemləri, pilotsuz uçuş aparatları ordumuzda aparılan modernləşmə işlərinin nümunələridir.
Bu parad bir daha göstərdi ki, ordu quruculuğu prosesi Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında ötən 22 ildə uğurla davam etdirilib. Bunun nəticəsində Azərbaycan Silahlı Qüvvələri bu gün regionun modern texnika ilə təchiz edilən, Vətənin müdafiəsinə daim hazır olan yüksək nizam-intizama malik bir quruma çevrilib. Azərbaycan Silahlı Qüvvələrinin bütün qoşun növlərinin, hərbi birləşmə və hərbi tədris müəssisələrinin şəxsi heyətlərinin, hərbi texnikaların iştirak etdiyi Zəfər paradında ölkə ictimaiyyəti bir daha dövlətimizin hərbi gücünün, ordumuzun döyüş və qələbə əzminin əyani şahidi oldu”.
S.Salmanova xatırladıb ki, beş il əvvəl, 2020-ci ilin dekabrında Bakıda keçirilən Zəfər paradı Azərbaycan tarixində milli qürurun, Ordumuzun gücünün və xalqımızın iradəsinin təntənəsi olmuşdu:
“2023-cü ildə Xankəndidə keçirilən hərbi parad isə Azərbaycanın suverenliyinin tam bərpa olunduğunu dünyaya bəyan etmişdi. Bu gün Azadlıq meydanında Vətən müharibəsində şanlı Qələbəmizin beşinci ildönümünə həsr olunmuş Hərbi parad isə yalnız hərbi gücümüzün nümayişi deyil, həm də xalqımızın qələbə ruhunun, milli həmrəyliyinin və gələcəyə inamının ifadəsidir”.
Parlamentari vurğulayıb ki, Prezident İlham Əliyev tədbirdəki çıxışında Zəfərin qürurunu və sevincini Azərbaycan xalqı ilə bölüşdü. Dövlətimizin başçısı əsgər və zabitlərimizin böyük qəhrəmanlıq, şücaət göstərərək şərəfli missiyanı yerinə yetirdiklərini bildirdi. Bizi Zəfərə yaxınlaşdıran amillərdən bəhs etdi:
“Cənab Prezident çıxışında 1990-cı illərin əvvəllərində Ermənistanın Azərbaycana qarşı apardığı işğalçılıq siyasəti nəticəsində torpaqlarımızın təxminən 20 faizi işğal altına düşdüyünü, bir milyon vətəndaşımızın qaçqın, köçkün vəziyyətinə salındığını, Ermənistanın xalqımıza qarşı hərbi cinayətlər, soyqırımı törətdiyini qeyd etdi. Bütün bu ağır sınaqlara baxmayaraq, xalqımız heç vaxt ümidini itirmədi, haqq-ədalət uğrunda mübarizəsini dayandırmadı. Ölkə başçımız İlham Əliyev hələ 2003-cü ildə ilk dəfə Azərbaycan Prezidenti seçiləndə bəyan etmişdi ki, nəyin bahasına olursa-olsun biz öz doğma torpaqlarımızı azad edəcəyik. Hər sözü imzası qədər keçərli olan cənab İlham Əliyev xalqımıza verdiyi bu vədinə də əməl etdi. Azərbaycan xalqı bu Şanlı Zəfərlə hər zaman fəxr edəcək. 44 günlük Vətən müharibəsində qazanılan tarixi Qələbə Prezident İlham Əliyevin müdrik rəhbərliyinin, xalq-ordu birliyinin və milli iradənin təntənəsidir. Bu Qələbə təkcə torpaqlarımızın azadlığı deyil, həm də Azərbaycan dövlətçiliyinin əbədi və dönməz qüdrətinin təsdiqidir”.
Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərifin paradda iştirak etməsi və çıxışları bütün dünyaya bir daha nümayiş etdirdi ki, Azərbaycan–Türkiyə–Pakistan dostluğu və qardaşlığı sarsılmaz, əbədi və strateji təməllər üzərində qurulub:
“Paradda Türkiyə və Pakistan hərbçilərinin nümunəvi keçidinin isə siyasi və rəmzi mənası var idi. 44 günlük Vətən müharibəsinin ilk günündən son gününədək Türkiyə Azərbaycanın yanında oldu, haqq səsimizə dəstək verdi. İstər Rəcəb Tayyib Ərdoğanın qətiyyətli çıxışları, istərsə də Türkiyənin digər rəsmi şəxslərinin Vətən müharibəsi zamanı etdiyi çıxışlar bizə əlavə ruh və güc verdi. Dövlətimizin başçısı çıxışı zamanı da bu məsələyə toxunaraq qeyd etdi ki, Azərbaycan xalqı bu qardaş dəstəyini heç vaxt unutmayacaq. Bundan başqa, ölkə başçımız Pakistan dövləti və xalqının 44 günlük Vətən müharibəsi zamanı Azərbaycana göstərdiyi dəstək və həmrəyliyi yüksək qiymətləndirdi. Bütün bunlar bir daha sübut edir ki, Azərbaycan, Türkiyə və Pakistan arasında formalaşan dostluq, qardaşlıq münasibətləri sadəcə siyasi əlaqə deyil, həm də ortaq dəyərlər, tarixi bağlar və gələcəyə yönəlmiş strateji əməkdaşlıqdır”.
S.Salmanova onu da vurğulayıb ki, bir vaxtlar mifləşdirilmiş “məğlubedilməz erməni ordusu”nun qalıqları bu gün bütün dünyaya Bakıda, Yeni Bulvar ərazisində salınmış Hərbi Qənimətlər Parkından nümayiş etdirilir:
“Onlar deyirdilər ki, tankları Bakı küçələrində olacaq, Bakıda çay içəcəklər. Prezidentimizin də söylədiyi kimi, əslində, onların bu arzuları həyata keçdi. Onların tankları bu gün Hərbi Qənimətlər Parkında nümayiş etdirilir. Erməni hərbi cinayətkarları bu gün Bakıda məhkəmə qarşısında cavab verirlər və istintaq təcridxanasında Azərbaycan çayını içirlər”.
17:17 08.11.2025
Oxunuş sayı: 1934
