Atatürk Mərkəzində Yunus Oğuzun kitabının təqdimatı keçirilib
Bu gün Azərbaycanda Atatürk Mərkəzində "Olaylar" qəzetinin baş redaktoru, yazıçı-publisist Yunus Oğuzun kitab təqdimatı keçirilib. Tədbirdə akademik, Mərkəzin müdiri Nizami Cəfərov, TÜRKSOY-un baş katibi Sultan Raev, yazıçı Varis Yolçuyev, "Yazarlar" saytının baş redaktoru Zaur Ustac, Mətbuat Şurasının İdarə Heyətinin üzvü Müşfiq Ələsgərli və media nümayəndələri iştirak edib.
Crossmedia.az xəbər verir ki, tədbiri akademik Nizami Cəfərov açıb. Nizami Cəfərov çıxışı zamanı qeyd edib ki, Yunus Oğuz bizim ədəbiyyatımıza, türklüyümüzə ləyaqətlə xidmət edir: "Yunus Oğuz bütün mükafatlara layiqdir".
TÜRKSOY-un Baş katibi Sultan Raev Yunus Oğuzun yaradıcılığının türk mədəniyyətinə verdiyi töhfəni yüksək qiymətləndirib: "Əziz dostlar, bu gün Atatürk Mərkəzində toplaşmaqdan qürur duyuram. Atatürk türk dünyası üçün simvoldur. TÜRKSOY olaraq iqtisadiyyatdan tutmuş dil, mədəniyyət və incəsənətə qədər bütün sahələrdə türk xalqlarının birliyinə çalışırıq. UNESCO ilə birgə iclaslarda da 300 milyonluq türk dünyasının dilinin beynəlxalq səviyyədə tanıdılması üçün fəaliyyət göstəririk."
Sultan Raev əlavə edib ki, Yunus Oğuzun "Nadir Şah" və "Əmir Teymur" kimi tarixi əsərləri türk tarixinin yaşadılması, bu birliyin gücləndirilməsində mühüm rol oynayır: "Yunus Oğuz bizim tariximizi, dəyərlərimizi yaşadan, keçmişi gələcəklə birləşdirən altun bir yazardır".
Tanınmış yazıçı, Azərbaycan Yazıçılar Birliyinin katibi, əməkdar incəsənət xadimi Elçin Hüseynbəyli tədbir iştirakçılarını və qonaqları salamlayaraq, qeyd edib: "Bu gün münasibətilə Yunus bəyi ürəkdən təbrik edirəm. Onun TÜRKSOY-un "Onur nişanı" ilə təltif olunması böyük qürur hissidir".
Azərbaycan Dövlət Su Ehtiyatları Agentliyinə daxil olan İri Şəhərlərin Birləşmiş Su Təchizatı publik hüquqi şəxsin (keçmiş "Azərsu" ASC) mətbuat xidmətinin rəhbəri Ceyhun Musaoğlu (Musayev) yazıçı Yunus Oğuzun fəaliyyətini yüksək qiymətləndirib. Ceyhun Musaoğlu bildirib ki, yaxşı jurnalist ilk növbədə "pozmağı" bacaran, nəyi yazmamağı dəqiq müəyyən edən peşəkardır. Onun sözlərinə görə, yazıçı isə yaratdığı cümlələrlə oxucunu öz tərəfinə çəkməyi bacarmalıdır. "Yazıçılıq həm pul qazanmaq, kapital toplamaq, həm də ədəbiyyata xidmət etməkdir. Elə yazıçılar var ki, sırf ədəbiyyata görə yazır. Yunus bəy də onlardan biridir. Yazdığı kitablarla milyonlarla gəlir əldə etmək olar, amma o, bunu ədəbiyyata, amala xidmət üçün edir", - deyə Musaoğlu qeyd edib.
Daha sonra çıxış edən filologiya üzrə elmlər doktoru Abid Tahirli qeyd edib ki, Yunus Oğuz özü də bilir ki, daha böyük mükafatlara layiqdir: "Bir şeyi də qeyd edim ki, mühacirət mətbuatı nəzərə alınmasa TÜRKSOY yarımçıq qalacaq. Xarici ölkələrdəki mühacirətlə bağlı işlər görmək aktualdır".
Digər iştirakçıların təbrik çıxışlarından sonra təqdimat yekunlaşıb. Xatirə şəkilləri çəkilib.
Ayhan
12:25 05.11.2025
Oxunuş sayı: 6465
