Paşinyan reallıqları nəzərə alaraq yeni regional düzənin tərkib hissəsinə çevrilməyə çalışır - Açıqlama
Ermənistanda son aylarda siyasi gərginlik artmaqdadır. Cəmiyyət iki düşərgəyə bölünüb – biri Rusiyaya sadiq qrup, digəri isə Qərbə inteqrasiya tərəfdarlarıdır. Baş nazir Nikol Paşinyan bu qarşıdurmada Qərbyönümlü xətti müdafiə edir. Onun əsas məqsədi Rusiyanın Ermənistandakı təsirini azaltmaq və ölkəni müstəqil siyasət yürüdən dövlətə çevirməkdir. Paşinyan, həmçinin, Azərbaycanla sülhə nail olaraq regionda yeni reallıqlara uyğunlaşmağa çalışır. Bu proses isə həm daxildə, həm də xaricdə ciddi müqavimət doğurur.
Bu barədə politoloq Elçin Xalidbəyli Crossmedia.az-a açıqlama verib: "Erməni toplumu artıq parçalanmış vəziyyətdədir. Parçalanmış qütblərdən biri tamamilə Rusiyaya bağlıdır, digəri isə Qərbə inteqrasiya tərəfdarları olaraq Paşinyan hakimiyyətini dəstəkləyir. Hazırda bu iki düşərgə arasında ciddi mübarizə gedir. Paşinyanın son açıqlamaları da məhz Rusiyanın Ermənistandakı əsas təsir mexanizmlərinin zərərsizləşdirilməsinə yönəlib. Paşinyan vurğulayır ki, Azərbaycanla Ermənistan arasındakı münaqişənin əsas mənbəyi Rusiya kəşfiyyatıdır və bu iki dövləti və xalqı bir-birinə düşmən etməklə Cənubi Qafqazda öz təsir mexanizmlərini qurub, bunu davam etdirməyə çalışır. Paşinyan tamamilə praqmatik siyasət yürütmək niyyətindədir. Xüsusilə də İkinci Qarabağ müharibəsindəki məğlubiyyətdən sonra Paşinyan hakimiyyəti anladı ki, Azərbaycanla savaşmaq yox, normal münasibətlər qurmaq, inkişaf etmək, blokadadan çıxmaq və ən əsası Qərbə inteqrasiya üçün Ermənistanın inkişaf imkanları qazanması lazımdır. Bu istiqamətdə də addımlar atmağa çalışır.
İlk növbədə Ermənistanda Rusiyanın agentura şəbəkəsini, erməni kilsəsini, erməni oliqarxiyasını və radikal revanşist düşərgəni sıradan çıxarmağa çalışır. Təbii ki, bu da ciddi müqavimətlə üzləşir və böyük ehtimalla seçki ərəfəsində Ermənistanda siyasi təlatümlər baş verə bilər. Paşinyan bu təlatümlərin qarşısını indidən almaq üçün praqmatik şəkildə əsl reallıqları Ermənistan cəmiyyətinə çatdırmağa çalışır, cəmiyyəti yeni siyasi situasiyaya, yeni reallıqlara öyrəşdirməyə çalışır. Bu baxımdan əsas məsələ Paşinyan hakimiyyətinin davamlı mövqe tutmasıdır. Azərbaycanla münasibətləri normallaşdırma istiqamətində qətiyyətli addımlar atması olduqca vacibdir. Eyni zamanda, Türkiyə ilə münasibətlərin normallaşması Azərbaycanla münasibətlərin normallaşma sürətindən asılıdır. Paşinyan da bu reallıqları nəzərə alaraq yeni regional düzənin tərkib hissəsinə çevrilməyə çalışır.
Təbii ki, Rusiya kəşfiyyatına bağlı olan qüvvələr Paşinyanın bu mövqeyindən ciddi şəkildə narahatdırlar və böyük ehtimalla seçki ərəfəsində Ermənistanda müəyyən qarşıdurmaların baş verməsi üçün bütün imkanlardan istifadə etməyə çalışacaqlar".
Türkan Kərimli
18:56 04.11.2025
Oxunuş sayı: 1566
