Azərbaycan və ABŞ arasında əlaqələr daha da intensivləşib - Deputat
Azərbaycanın xarici siyasət kursunda yeni bir mərhələnin başlanğıcı kimi dəyərləndirilə biləcək mühüm hadisə baş verib. Prezident İlham Əliyevin 8 avqust tarixində ABŞ-yə səfəri çərçivəsində iki ölkə arasında strateji tərəfdaşlıq səviyyəsinə yüksələn münasibətləri təsbit edən anlaşma memorandumu imzalanıb. Bu sənəd Azərbaycan–ABŞ əlaqələrinin gələcək inkişaf istiqamətlərini müəyyənləşdirən, çoxşaxəli əməkdaşlığın əsasını qoyan strateji bir addım kimi xarakterizə olunur.
Prezident Administrasiyasının Xarici siyasət məsələləri şöbəsinin müdiri Hikmət Hacıyevin açıqlamasına əsasən, memorandum iki ölkə arasında işçi qrupunun yaradılmasını, bu qrupun isə enerji, nəqliyyat, süni intellekt, yüksək texnologiyalar, müdafiə və təhlükəsizlik kimi prioritet sahələr üzrə konkret təkliflər hazırlamasını nəzərdə tutur. Beləliklə, Azərbaycan və ABŞ arasında münasibətlər təkcə diplomatik əməkdaşlıq səviyyəsindən çıxaraq, qarşılıqlı strateji maraqlara əsaslanan tərəfdaşlıq modelinə çevrilməkdədir.
Bu hadisə həm regional, həm də qlobal müstəvidə Azərbaycanın artan geosiyasi rolunun bariz göstəricisidir və ölkəmizin müasir beynəlxalq münasibətlər sistemində etibarlı tərəfdaş kimi mövqeyini bir daha təsdiqləyir.
Mövzu ilə bağlı Milli Məclisin deputatı Vüqar Bayramov Crossmedia.az-la öz fikirlərini bölüşüb: "Azərbaycan ilə Amerika Birləşmiş Ştatları arasında strateji əməkdaşlığın formalaşması istiqamətində işlər daha da intensiv xarakter alıb. Dəyirmi masa müzakirələrində də vurğulandığı kimi, hər iki ölkə qarşıdakı dövrdə xüsusilə strateji sahələrdə əməkdaşlığın genişləndirilməsində maraqlıdır.
Strateji əməkdaşlıq, eyni zamanda, praktiki baxımdan ölkələrin iqtisadi inkişafına, qarşılıqlı investisiyaların artmasına və qərarvermə proseslərinin daha çevik olmasına mühüm töhfə verəcək".
Deputat həmçinin hazırda iki ölkə arasında ticarət dövriyyəsi 1,8 milyard ABŞ dolları həcmindədir və bu göstəricinin artması üçün real perspektivlərin mövcud olduğunu qeyd edib: "ABŞ-ın əsas iqtisadi tərəfdaşlardan biri kimi çıxış etməsi, strateji əməkdaşlığın yalnız siyasi müstəvidə deyil, həm də iqtisadi sahədə dərinləşməsinə şərait yaradır.
Nəticə etibarilə, strateji əməkdaşlığın institusional səviyyədə möhkəmlənməsi iki ölkə arasında münasibətlərin yeni mərhələyə keçməsinə, iqtisadi əlaqələrin daha geniş miqyasda və davamlı şəkildə inkişafına xidmət edəcək".
Elmir Heydərli
16:08 01.11.2025
Oxunuş sayı: 1448
