Qurultayın 100 illik yubileyinə töhfə olaraq ortaq əlifbanın qəbulu əlamətdar hadisə olacaq - Alimdən açıqlama
Azərbaycan Respublikasının Prezidenti İlham Əliyev tərəfindən imzalanan mühüm sənədə əsasən, 2026-cı ilin fevral ayında Bakıda Birinci Türkoloji Qurultayın 100 illik yubileyi təntənəli şəkildə qeyd olunacaq.Yubiley çərçivəsində elmi konfranslar, mədəni tədbirlər və simpoziumlar keçiriləcək, Birinci Türkoloji Qurultayın ideyalarının müasir dövrdə reallaşması istiqamətində görülən işlərə yeni nəfəs veriləcək. Bu qərar həm Azərbaycan elmi-mədəni həyatının, həm də bütövlükdə türk dünyasının birliyinin və mənəvi dirçəlişinin növbəti simvolu kimi qiymətləndirilir.
Qarabağ Universitetinin Elm şöbəsinin müdiri, filologiya elmləri doktoru, dosent Elçin İbrahimov Crossmedia.az-a açıqlamasında bildirib ki, Birinci Türkoloji Qurultayın 100 illik yubileyi yalnız Azərbaycanın deyil, bütövlükdə Türk dünyasının ortaq elmi və mədəni hadisəsinə çevriləcək. Onun sözlərinə görə, 1926-cı ildə Bakıda keçirilən Birinci Türkoloji Qurultayın ardınca ikinci qurultayın Səmərqənddə təşkili nəzərdə tutulsa da, tarixi-siyasi amillər səbəbindən bu plan həyata keçməmişdi. “Odur ki, bir əsr sonra həmin böyük ideyanın yenidən canlanması Türk dünyasının elmi və mənəvi birliyinin təcəssümü kimi dəyərləndirilə bilər,” – deyə Elçin İbrahimov qeyd edib.
O vurğulayıb ki, Prezident İlham Əliyevin imzaladığı Sərəncam dövlət səviyyəsində türkologiya elminə, milli-mənəvi dəyərlərə və elmi irsə verilən yüksək qiymətin göstəricisidir. “Azərbaycan, xüsusilə də Bakı şəhəri tarixən türkoloji tədqiqatların və elmi müzakirələrin aparıcı mərkəzlərindən biri kimi tanınıb. Hesab edirəm ki, yubiley ilində Türkoloji Qurultay həm Azərbaycanda, həm də bütün Türk dünyasında silsilə tədbirlərlə qeyd ediləcək.”
Elçin İbrahimov əlavə edib ki, 1926-cı ildə Bakıda baş tutmuş bu möhtəşəm toplantı Türk dünyasının elm, mədəniyyət və dil birliyi istiqamətində atılmış ən strateji addımlardan biri olub. Qurultayın 100 illiyi həm ölkəmizdə, həm də bütün Türk dünyasında geniş şəkildə qeyd olunacaq: “Bu yubiley tədbirləri çərçivəsində yeni və əlamətdar qərarların qəbul ediləcəyi gözlənilir. Hesab edirəm ki, Qurultayın 100 illik yubileyinə bir töhfə kimi ortaq əlifbanın qəbulu olduqca simvolik və əlamətdar hadisə olacaq.”
Sonda Elçin İbrahimov bildirib ki, bu yubiley təkcə tarixi yaddaşın bərpası deyil, həm də Türk dünyasının gələcəyə yönəlmiş elmi, mənəvi və mədəni birliyinin təsdiqi kimi tarixə düşəcək.
Nastya Qəniyeva
15:41 01.11.2025
Oxunuş sayı: 1710
