Jurnalistlər Milli Məclisdə telefon qadağasının götürülməsinə münasibət bildiriblər - Sorğu
Son zamanlar Milli Məclisdə media ilə əməkdaşlıq sahəsində müşahidə olunan yeniliklərdən biri jurnalistlərin fəaliyyət şəraiti ilə bağlıdır. Belə ki, uzun müddət parlament iclaslarını işıqlandıran media nümayəndələrinin mobil telefonlardan istifadə imkanları məhdudlaşdırılmışdı. Qaydaya əsasən, jurnalistlər iclas zalına daxil olarkən mobil telefonlarını xüsusi yerə təhvil verməli, iş prosesini yalnız onlara ayrılmış texniki vasitələrdən istifadə etməklə həyata keçirməli idilər. Bu məhdudiyyət əsasən təhlükəsizlik və iş intizamının qorunması məqsədilə tətbiq olunurdu.
Lakin artıq Milli Məclisdə bu təcrübədən imtina edilib. Son dəyişikliklərə əsasən, jurnalistlər parlamentin iclas zalına mobil telefonları ilə daxil ola və işlərini daha sərbəst şəkildə qura bilirlər. Bu addım media nümayəndələrinin fəaliyyətinin asanlaşdırılması, onların işinin operativliyinin artırılması və ümumilikdə parlamentlə media arasında daha şəffaf, etimadlı münasibətlərin qurulmasına xidmət edir.
Yeni qərar həm də müasir informasiya mühitinin tələblərinə uyğun olaraq Milli Məclisin media siyasətində çevik və açıq yanaşmanın formalaşdığını göstərir. Jurnalistlər üçün yaradılan bu imkan, eyni zamanda, ictimaiyyətin parlament fəaliyyətinə daha dolğun və vaxtında məlumatlandırılmasına şərait yaradır.
Məsələ ilə bağlı bir qrup parlament müxbiri Crossmedia.az-la öz fikirlərini bölüşüb:
"Şərq" qəzetinin parlament üzrə müxbiri İsmayıl Qocayev əvvəllər bu halın bizim parlament jurnalistləri üçün müəyyən qədər problem olduğunu qeyd edib: "Bu gün mobil telefon elə bir vasitədir ki, artıq hamının istifadə etdiyi smartfonlar sadəcə klassik, köhnə telefonlar kimi yalnız zəng və danışıq üçün nəzərdə tutulmur. Biz mobil telefonlardan yazıların hazırlanması, xəbərlərin operativ şəkildə redaksiyaya ötürülməsi, məlumatların dəqiqləşdirilməsi kimi işlərdə fəal şəkildə istifadə edirik.
Yəni operativlik baxımından mobil telefonlar artıq kompüterləri və noutbukları belə əvəz edib. Buna görə də, telefonların girişdə bizdən alınması müəyyən çətinlik yaradırdı. Əlbəttə, biz anlayırdıq ki, bu qərar təhlükəsizlik məqsədilə verilmişdi. Narazılığımız etiraz xarakteri daşımırdı, sadəcə rəhbərliyə bu məsələnin aradan qaldırılması və jurnalistlərə mobil telefonlarla daxil olmağa icazə verilməsi ilə bağlı müraciətlər etmişdik.
Artıq zalda kamera nəzarəti var, orada kiminsə hər hansı qayda pozuntusuna yol verməsi halında bu, dərhal müəyyən edilir və müvafiq tədbir görülür. Ona görə də bu qərarın dəyişdirilməsi, yəni mobil telefon məhdudiyyətinin aradan qaldırılması çox müsbət addımdır.
Bu məsələ ilə bağlı bir qrup jurnalist dəfələrlə müraciət etmişdi və bu dəfə müraciətlər nəzərə alındı. Qərarı həm biz, media nümayəndələri, həm də parlament rəhbərliyi müsbət qiymətləndiririk. Bu, həm işimizin keyfiyyətinə, həm də parlament-media əməkdaşlığının daha səmərəli inkişafına xidmət edir".
Yeni Müsavat Media Qrupunun parlament müxbiri Elşad Paşasoy da Crossmedia.az-la fikirlərini bölüşüb: "Təbii ki, parlament müxbirlərinin, ümumilikdə isə Milli Məclis binasına daxil olan media təmsilçilərinin mobil telefondan istifadəsinə qoyulmuş məhdudiyyətin aradan qaldırılması çox sevindirici xəbərdir. Əslində, bu məsələ ilə bağlı bundan əvvəl də parlament rəhbərliyinə bir neçə dəfə müraciətlər edilmişdi. Həmçinin təhlükəsizlik tədbirlərini həyata keçirən aidiyyəti qurumun rəhbərliyinə də bu istiqamətdə müraciətlər olunmuşdu.
Qeyd etmək lazımdır ki, parlament rəhbərliyi də həm şəxsi görüşlərdə, həm də rəsmi müraciətlər zamanı bildirmişdi ki, bu məsələyə etirazı yoxdur və qərar səlahiyyətində olan qurum tərəfindən veriləcək. Biz də həmin müraciətlərin edildiyindən xəbərdar idik və nəhayət, bu qadağa aradan qaldırıldı.
Hesab edirəm ki, jurnalistlər üçün mobil telefondan istifadənin bərpa olunması informasiya dövründə çox mühüm addımdır. Çünki indi xəbərin hazırlanması və paylaşılması saniyələr içində baş verir. Mobil telefonlardan sərbəst istifadə media nümayəndələrinin operativ fəaliyyətini təmin edir, parlamentin işinin işıqlandırılmasını asanlaşdırır və nəticədə ictimaiyyətin daha çevik şəkildə məlumatlandırılmasına xidmət edir. Bu baxımdan, qəbul edilən qərar həm media azadlığının genişlənməsi, həm də parlamentin açıq fəaliyyət prinsiplərinin güclənməsi baxımından çox faydalıdır.
Bu qərarın qəbuluna dəstək göstərən, media nümayəndələrinin mövqeyini hər zaman nəzərə alan, plenar iclaslarda və komitə toplantılarında jurnalistlərə diqqət və qayğı ilə yanaşan Milli Məclisin sədri Sahibə xanım Qafarovaya və əməyi keçən hər kəsə təşəkkürümüzü bildiririk.
Eyni zamanda, aldığımız məlumata əsasən, Azərbaycan Respublikasının Strateji Obyektlərin Mühafizəsi Dövlət Agentliyi cavabdeh qurumun yeni rəhbərliyinin gəlişindən sonra bu məsələnin müsbət şəkildə həll edilməsi də ədalətli və sağlam yanaşmanın göstəricisidir. Bu münasibətlə bütün aidiyyəti şəxslərə media ictimaiyyəti adından təşəkkürümüzü ifadə edirik".
15:36 01.11.2025
Oxunuş sayı: 4792
