“Güvən”in xeyriyyə aksiyaları: Kiçik addımlarla böyük dəyişikliklər
Uşaqlar üçün təşkil olunan hədiyyə paylama aksiyaları, xüsusilə imkanları məhdud olan uşaqlara diqqət yetirən təşəbbüslər, uzun illərdir müxtəlif ölkələrdə yayılmış xeyriyyə ənənələrindən ilhamlanır. Bu cür aksiyaların əsas məqsədi həm ehtiyacı olan uşaqlara sevinc bəxş etmək, həm də cəmiyyətin diqqətini sosial bərabərsizliyə çəkməkdir. Gənclər və böyüklər tərəfindən həyata keçirilən bu layihələr, həm sosial həmrəyliyi gücləndirir, həm də uşaqların psixoloji və emosional rifahına müsbət təsir göstərir.
Mövzu ilə bağlı Crossmedia.az-a açıqlamasında “Güvən” Xeyriyyə İctimai Birliyinin sədri Nigar Bayramlı bildirib ki, kiçik addımlarla böyük sevinc bəxş etmək mümkündür:
“2009-cu ildə ilk dəfə təhsildən kənarda qalan qaraçı qızlara dəstək olmaq üçün Facebook-da kiçik bir qrup yaratmışdım. O qrupda tək idim, nəyi necə edəcəyimi bilmirdim, amma çalışdığım müəssisənin qarşısında dilənən balaca qızları görəndə onlara yardım etmək istəyi ilə hərəkətə keçmişdim”.
N.Bayramlı bu ideanın necə yaranmasından da danışıb:
“2012-ci ildə uğursuz başlanğıcı geridə qoyub “Help Hand” adlı bir səhifə yaratdım. Bu səhifə sonradan “Güvən”in bünövrəsinə çevrildi. “Güvən” ideyası uşaqlıqdan həyatın ədalətsizliklərinə şahid olmağımdan yaranıb. Bəzilərimiz üçün adi olan – bir oyuncaq, bir kitab, bir məktəb çantası başqaları üçün əlçatmaz olur. Biz isə düşündük ki, kiçik addımlarla böyük sevinc bəxş etmək mümkündür.
Mən inanıram ki, mərhəmət – rasional düşüncədən doğan hissdir. Yazığı gəlməkdən doğan yardım əslində qorxu və ya vicdan yüngülləşməsi ola bilər, amma düşünülmüş mərhəmət uzunmüddətli dəyişiklik gətirir.
2022-ci il fevralın 7-də “Güvən” Ədliyyə Nazirliyinin qərarı ilə rəsmi QHT kimi qeydiyyatdan keçdi. Hazırda biz “Güvən” Xeyriyyə İctimai Birliyi olaraq ölkənin müxtəlif bölgələrində uşaqlar üçün sosial və xeyriyyə layihələri həyata keçiririk. Qeydiyyatdan əvvəl necə çalışırdıqsa, bu gün də eyni ruhla davam edirik. Dəstəkçilərimiz arasında böyük şirkətlər də, sadə vətəndaşlar da var”.
O özlərinin gələcək planlarını vurğulayıb:
“Yalnız maddi yardım yox, ünsiyyət, motivasiya və sosial-emosional dəstək də bizim fəaliyyətimizin əsas hissəsidir.
Gələcək planlarımız içərisində kənd məktəblərini daha geniş əhatə etmək, təhsilə yönəlmiş layihələr həyata keçirmək, uşaqlarla psixoloji maarifləndirmə tədbirləri keçirmək, gəncləri bu fəaliyyətlərə cəlb etmək məsələləri var. Çünki inanırıq ki, dəyişiklik təkcə yardım verməklə deyil, bir-birimizi anlamamaqla başlayır. Donor tapmaq hər il daha da çətinləşsə də, biz ümidimizi itirmədən cəmiyyət üçün çalışmaqda davam edirik”.
Günel Verdiyeva
15:50 30.10.2025
Oxunuş sayı: 5469
