Azərbaycan–Türkiyə–Gürcüstan hərbi əməkdaşlığı regional təhlükəsizliyin möhkəmlənməsinə töhfə verir- Ekspert
Qoridə Azərbaycan, Gürcüstan və Türkiyə hərbi akademiyalarının rəhbər heyətlərinin görüşü regional təhlükəsizlik arxitekturasının gücləndirilməsi baxımından mühüm əhəmiyyət daşıyır. Bu görüş yalnız hərbi əməkdaşlığın davamı deyil, həm də üç ölkənin strateji tərəfdaşlığının təhsil, kadr hazırlığı və müdafiə konsepsiyası səviyyəsində dərinləşdiyini göstərir. Mahiyyət etibarilə, söhbət sadəcə təcrübə mübadiləsindən deyil, vahid təhlükəsizlik mühitinin formalaşdırılması və gələcək zabit heyətinin müasir çağırışlara uyğun şəkildə hazırlanması istiqamətində atılan addımdan gedir.
Regionun üç ölkəsi arasında təcrübə mübadiləsinin əhəmiyyəti barədə hərbi ekspert Şair Ramaldanov Crossmedia.az-a açıqlama verib:
"Azərbaycan bütün istiqamətlərdə, o cümlədən hərbi sahədə də münasibətləri genişləndirir. Azərbaycan, Türkiyə və Gürcüstanın hərbi rəhbərləri mütəmadi və planlı əsasda görüşürlər. Bu üç ölkənin orduları artıq zəngin təcrübəyə əsaslanaraq birgə fəaliyyətləri, ortaq təlimləri və müxtəlif hərbi-siyasi tədbirlərdə iştirakları vasitəsilə əməkdaşlığı daha da dərinləşdirirlər. Həm qərargah təlimləri, həm praktiki manevrlər, həm də akademik mübadilə proqramları çərçivəsində peşəkar təcrübə bölüşülür və kadr hazırlığı istiqamətində ixtisaslaşdırılmış proqramlar təkmilləşdirilir".
Ekspert həmçinin bildirib ki, Bakı–Tbilisi–Ceyhan kimi enerji və logistika xətlərinin üzərində yerləşən ölkələr üçün beynəlxalq terrorizm və onun müasir metodları xüsusi təhlükə mənbəyidir: "Buna görə də ölkələrimiz həmin kəmərlərin müdafiəsi və enerji təhlükəsizliyinin təmin edilməsi məqsədilə koordinasiyanı gücləndirir, birgə mübarizə mexanizmlərini inkişaf etdirirlər. Hərbi akademiyaların rəhbərlərinin və ekspertlərinin görüşləri, təcrübə təhlilləri və tədris proqramlarının yenilənməsi gələcək zabit nəsillərinin hazırlanmasında mühüm rol oynayır. Nəticə etibarilə, Azərbaycan–Türkiyə–Gürcüstan hərbi əməkdaşlığı regional təhlükəsizliyin möhkəmlənməsinə və strateji obyektlərin etibarlı müdafiəsinə əhəmiyyətli töhfə verir".
Ayhan
18:45 24.10.2025
Oxunuş sayı: 1090
