Ermənistanda insan haqlarının pozulması faktlarına Qərb dövlətləri göz yumur - ŞƏRH
Ermənistan KİV-lərinin İstintaq Komitəsinə istinadla verdiyi məlumata görə, Gümrü meri binası qarşısında keçirilən etiraz aksiyasından sonra vətəndaşlarla yanaşı daha bir neçə din xadimi də saxlanılıb. Vətəndaşlar kütləvi iğtişaşlar və ədalət mühakiməsinə mane olmaq ittihamı ilə saxlanılıblar. Gümrü sakinləri müxalifət yönümlü mer Vardan Qukasyanın saxlanmasının qarşısını almaq məqsədilə toplaşmışdılar. Ermənistan vətəndaşlarının bu aksiyası Paşinyanın hakimiyyətinin gələcəyinə, dövlətin daxili siyasətinə necə təsir göstərəcək?
Mövzu ilə bağlı siyasi şərhçi Azad Məsiyev Crossmedia.az-a danışıb. O bildirib ki, Paşinyan ABŞ-ın həm maliyyə, həm də siyasi dəstəyi ilə hakimiyyətə gətirilib: ‘’O, Amerika qarşısında müəyyən öhdəliklər götürüb və fəaliyyəti bütövlükdə Qərbin maraqlarına uyğun siyasət yürütmək üzərində qurulub. Amerikanın və ümumilikdə Qərbin bir prinsipi var: hansı dövlət onların maraqlarına uyğun fəaliyyət göstərirsə, həmin ölkə “demokratik” və “insan haqlarına hörmət edən” dövlət kimi təqdim olunur. Əksinə, əgər bir dövlət ABŞ-ın maraqlarına xidmət etmirsə, o zaman dərhal “antidemokratik rejim”, “diktatura” və “insan haqlarının pozulduğu ölkə” kimi qiymətləndirilir, nəticədə isə həmin dövlətlərə qarşı təzyiqlər, çevriliş cəhdləri həyata keçirilir və Qərbə yaxın şəxslər hakimiyyətə gətirilir. Paşinyan isə hazırda tam şəkildə Amerikanın maraqlarına uyğun siyasət həyata keçirir. Ermənistanda baş verən hər bir antidemokratik hadisə və insan haqlarının pozulması faktlarına ABŞ və Qərb dövlətləri göz yumur. Çünki Paşinyan onların maraqlarına xidmət edir. Beləliklə, Qərbin baxışına görə, Ermənistanda baş verən hadisələr “demokratik” kimi təqdim olunur. Halbuki, eyni vəziyyəti Gürcüstanda müşahidə etmirik. Bu yaxınlarda Gürcüstanda bələdiyyə seçkiləri keçirildi, lakin Qərbyönlü müxalifət seçkiləri boykot etdi və nəticələri tanımadığını bəyan edərək dövlət çevrilişinə cəhd göstərdi. Seçkilər zamanı iğtişaşlar, polis əməkdaşlarının yaralanması və dövlət əmlakına ciddi ziyan vurulması halları baş verdi. Buna baxmayaraq, Qərb dövlətləri Gürcüstanı “antidemokratik” adlandırdı və insan haqlarının pozulmasından danışmağa başladı’’.
Azad Məsiyev qeyd edib ki, bu ikili standartlar beynəlxalq ictimaiyyətin gözü qarşısında baş verir və haqlı narazılıq yaradır: ‘’Ermənistanda baş verən proseslər isə açıq şəkildə antidemokratikdir. Paşinyan artıq 2026-cı ildə keçiriləcək parlament seçkilərinə hazırlaşır və indidən ona qarşı olan müxalif qüvvələri neytrallaşdırmağa çalışır. O, həm müxalifət düşərgəsində, həm də kilsə ilə münasibətlərində bu istiqamətdə addımlar atır. Məqsəd – seçkilər ərəfəsində öz nüfuzunu möhkəmləndirmək və rəqibləri zəiflətməkdir. Bu cür həbslər və siyasi təzyiqlər qarşıdan gələn seçkilərin obyektivliyinə kölgə salır. Lakin Qərb tərəfindən bu məsələlərə susqunluqla yanaşılır. Hər şey bir daha göstərir ki, hansı dövlət Amerikanın maraqlarına xidmət edirsə, orada “demokratiya” var, xidmət etməyənlərdə isə “diktatura”. Bu gün Paşinyanın apardığı kütləvi həbslərə və siyasi təzyiqlərə Qərb, xüsusən də ABŞ səssiz qalır. Halbuki, eyni hadisələr başqa bir dövlətdə baş versəydi, dərhal sərt reaksiyalar və etiraz bəyanatları səsləndirilərdi’’.
Şərhçi vurğulayıb ki, Ermənistanda baş verən proseslər Paşinyanın 2026-cı il seçkilərində hakimiyyətdə qalmaq və mövqeyini gücləndirmək məqsədi daşıyır: ‘’Bununla yanaşı, qeyd etmək lazımdır ki, Ermənistanın əksər dövlət strukturları "soros"çuların təsiri altındadır və bu qüvvələr də bilindiyi kimi Amerikanın maraqlarına xidmət edir. Məhz buna görə də, ölkədə baş verən hadisələr "soros"çular tərəfindən idarə olunur və siyasi proseslər bu istiqamətdə tənzimlənir. Nəticə etibarilə, Ermənistanda baş verənlər Paşinyanın hakimiyyətini qorumağa yönəlmiş siyasi addımlardır’’.
Sevinc Yarməmmədova
10:32 23.10.2025
Oxunuş sayı: 3270
