Tramp nə istəyir: Müharibəni bitirmək, yoxsa normal münasibət? - Açıqlama
Rusiya Prezidenti Vladimir Putinlə ABŞ lideri Donald Tramp arasında telefon danışığı uzun, səmimi və faydalı olub. Bu barədə Rusiya prezidentinin köməkçisi Yuri Uşakov danışıb.
Uşakov jurnalistlərə deyib: "Telefon danışığı uzun idi, təxminən iki saat yarım davam etdi. Bu, çox məlumatlı və eyni zamanda son dərəcə səmimi və məxfi idi".
Onun sözlərinə görə, liderlər geniş spektrli məsələləri müzakirə ediblər və əlaqələri davam etdirmək barədə razılığa gəliblər.
"Ümumilikdə deyərdim ki, Rusiya və ABŞ prezidentləri arasında telefon əlaqəsi çox faydalı oldu və iki lider əlaqə saxlamağa razı oldular", - deyə prezidentin köməkçisi qeyd edib.
Uşakov əlavə edib ki, Putin və Tramp şəxsi görüşün mümkünlüyünü müzakirə ediblər: "Bu, həqiqətən də, çox vacib məqamdır. Razılığa gəlindi ki, iki ölkənin nümayəndələri dərhal, məsələn, Budapeştdə keçirilə biləcək sammitə hazırlaşacaqlar".
Mövzu ilə bağlı Crossmedia.az-a açıqlama verən siyasi şərhçi Samir Hümbətov bildirib ki, ABŞ-Rusiya danışığı müharibəni bitirməkdən çox münasibətləri normallaşdırmağa yönəlib: "ABŞ prezidenti ilə Rusiya prezidenti arasında baş tutan telefon danışığı, düzdür, Rusiya-Ukrayna müharibəsinin dayandırılması məqsədini daşısa da, mən düşünmürəm ki, tam olaraq bu telefon danışıqları ilə məsələ həll oluna bilər. Əlbəttə, son vaxtlar Rusiyanın kəşfiyyat əməliyyatları, xüsusən də NATO ölkələrində apardığı kəşfiyyat əməliyyatları ABŞ-ni narahat edən məsələdir. Mən düşünürəm ki, Trampın telefon danışığında bu məsələlər də müzakirə predmetinə çevrilə bilər. Rusiya Ukrayna müharibəsi, orada ABŞ-nin göstərə biləcəyi mümkün dəstək, Ukrayna münaqişəni dayandırmaq üçün atılan addımlar və s. əsas müzakirə predmetinə aid edilə bilər. Amma bununla bərabər həm də ikili münasibətlər də var. Hər nə qədər desək ki, ABŞ və Rusiya arasında münasibətlər kəskinləşib və əlaqələri yox səviyyəsindədir. O zaman yanlışlığa yol vermiş ola bilərik. Düşünürəm ki, Tramp bir tərəfdən münaqişəni bitirməyə çalışsa da, ikinci bir tərəfdən Trampın əsas hədəfi Rusiya ilə münasibətləri iqtisadi zəmində normallaşdırmaqdır. Amma bunu açıq yox, hələ ki, qapalı, daha sonrakı mərhələdə Rusiya-Ukrayna müharibəsi bitərsə və Trampın istəyi reallaşarsa, o zaman artıq real bir görüntü də bunu davam etdirmək istəyə bilər. Mən düşünmürəm ki, Avropa ölkələri Trampın bu addımı ilə ortadan çəkilərlər. Bu hələ ki, inandırıcı görünmür. Çünki Avropanın təhlükəsizliyi arxitekturasında ABŞ-nin rolu danılmazdır. Ona görə də Avropa dövlətləri bu məsələdə ehtiyatlı yanaşacaqlar və ABŞ ilə münasibətləri korlamaq istəməzlər".
Samir Hümbətov ABŞ-Rusiya münasibətlərinin ABŞ-Ukrayna münasibətlərinə necə təsir edəcəyindən də danışıb: "Ukrayna müharibəsinə isə təsiri o yöndən ola bilər ki, deyək ki, müharibəni dayandırmaq üçün. Amma bu da yetərli deyil. Bəlkə də Rusiya Ukraynaya verilən silahların daha çox verilməməsinə nail ola bilər. Yəni məsələ həm bir az gərgin, həm də qəlizdir".
Günel Verdiyeva
20:27 17.10.2025
Oxunuş sayı: 7633
