Cəmiyyətdəki taksi problemi: Sərnişin və sürücü prosesə laqeyd yanaşmasa...
Son zamanlar taksi sürücüləri ilə bağlı şikayətlər xeyli artıb. Vətəndaşlar bildirirlər ki, bəzi sürücülər sifarişi qəbul etdikdən sonra müştəridən onu ləğv etməyi tələb edir, imtina olunduqda isə sərnişinləri təhqir edirlər. Bu hallar ictimai narazılığa səbəb olmaqla yanaşı, həm də sərnişin hüquqlarının pozulması kimi qiymətləndirilir.
Belə mənfi hallar getdikcə artır. Bu isə sərnişinlərlə sürücülər arasında konfliktə səbəb olur, taksi xidmətinə inamı azaldır. Demək olar, hər gün analoji bir hadisənin şahidi oluruq. Daha bəs deyilmi?
Bu barədə Crossmedia.az-a danışan nəqliyyat eksperti Elməddin Muradlı söyləyib ki, belə halların qarşısının alınması üçün mütləq həmin sürücülərdən şikayət edilməlidir: “İstənilən taksi tətbiqində bu məqsədlə xüsusi şikayət bölməsi mövcuddur.Sürücülərin sifarişi ləğv etmə hallarının əsas səbəblərindən biri ödənişin kartla aparılmasıdır. Onlar bunu şirkətin kartla ödənilən məbləğləri gecikdirməsi ilə əsaslandırırlar. Lakin artıq bəzi taksi şirkətləri bu problemi aradan qaldırmaq üçün addımlar ataraq, sürücülərin kartla olan ödənişləri daha tez nağdlaşdırmasına şərait yaradıblar. Əgər bu sistem digər şirkətlərdə də tətbiq olunsa, sözügedən problem böyük ölçüdə həllini tapa bilər.Təhqir və digər qayda pozuntuları ilə bağlı isə sərnişinlərin tətbiq üzərindən şikayət etməsi mühüm əhəmiyyət daşıyır. Bu cür müraciətlərə şirkətlər tərəfindən ciddi yanaşılır və qayda pozan sürücülərə qarşı müvafiq cəzalar tətbiq olunur. Sərnişinlərdə bu məsələdə daha fəal olsalar, belə neqativ halların sayı gözlə görüləcək dərəcədə azalacaq”.
O bildirib ki, sərnişinlə sürücü arasında münasibətləri tənzimləyən qanun və qaydalar mövcuddur: “Lakin bəzən vətəndaşlar öz hüquqlarından səmərəli istifadə etmir, hətta bir çoxları bu hüquqlar barədə ümumiyyətlə məlumatlı olmur. Nəticədə belə halların sayı artır və problemlər davamlı xarakter alır. Hər bir vətəndaş hüquqlarını bilməli və qaydalara riayət etməyən sürücüləri dərhal şikayət etməlidir. Bu sayədə xidmətdən qaçınan və düzgün xidmət göstərməyən sürücülər cəzalandırılar. Bu, həm sərnişinlərin təhlükəsizliyini təmin edər, həm də xidmət keyfiyyətini artırar. Əgər həm sərnişin, həm də sürücü prosesə laqeyd yanaşmasa, bu problemlər mərhələli şəkildə həllini tapacaq”.
Fatimə Hacıəliyeva
21:51 16.10.2025
Oxunuş sayı: 7508
