“Astronomiya Olimpiadaları: Məsələlər və onların həlləri” kitabının təqdimatı keçirilib
14 oktyabr 2025-ci il tarixində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Azərbaycanda Astronomiya Təhsilinin Təşviqi” layihəsi çərçivəsində “Həvəskar Astronomlar Cəmiyyəti” ictimai birliyi tərəfindən “ASTRONOMİYA OLİMPİADALARI: Məsələlər və onların həlləri” kitabının təqdimatı keçirilib. Tədbir Park Bulvar Ticarət Mərkəzində yerləşən Tusi-Bohm Planetariumunda baş tutub.
Crossmedia.az xəbər verir ki, layihə rəhbəri Nağıyev Faiq açılış nitqində layihənin məqsədlərindən və qrant çərçivəsində görülən işlərdən danışıb. O vurğulayıb ki, layihənin əsas məqsədi astronomiya sahəsində təhsilin və marağın artırılması, həmçinin məktəblilər və tələbələr üçün azərbaycandilli tədris resurslarının genişləndirilməsidir.
Kitab haqqında Tusi-Bohm Planetariumunun direktoru və Azərbaycan Astronomiya Olimpiadasının təşkilatçısı Famil Mustafa təqdim edib. O qeyd edib ki, belə bir kitabın Azərbaycan dilində nəşri, artan maraq fonunda, olimpiada iştirakçıları üçün vacib və zəruri bir addımdır.
Kitabın tərcüməsində iştirak edən Şamaxı Astrofizika Rəsədxanasının əməkdaşları — Nazim Hüseynov və Kamal Hüseynov öz çıxışlarında tərcümə prosesi və elmi redaktə zamanı qarşılaşdıqları maraqlı məqamlar barədə danışıblar.
Tədbirin sonunda iştirakçılar planetarium zalında nümayiş olunan elmi-populyar filmi izləyib və xatirə şəkli çəkdiriblər.
14:20 15.10.2025
Oxunuş sayı: 5975
