Azərbaycanın strateji üstünlüyünü təmin edən əsas amil budur - Deputat açıqladı
Müasir dövrdə qlobal iqtisadiyyatın əsas dayaqlarından biri səmərəli nəqliyyat-kommunikasiya infrastrukturunun qurulmasıdır. Xəzər dənizindən Aralıq və Qara dənizlərə uzanan marşrutlar üzərində yerləşən Azərbaycan bu baxımdan mühüm strateji mövqeyə malikdir. Məhz bu üstünlüyü nəzərə alaraq, ölkəmiz regionda yeni nəqliyyat reallığının formalaşmasında aparıcı rol oynayır.
Bu istiqamətdə atılan ən mühüm addımlardan biri Zəngəzur dəhlizinin işə salınması ilə Xəzər dənizindən Aralıq və Qara dənizlərə birbaşa bağlantının təmin olunmasıdır. Rəqəmsal İnkişaf və Nəqliyyat naziri Rəşad Nəbiyevin Brüsseldə keçirilən “Global Gateway” konfransında səsləndirdiyi fikirlər də göstərir ki, Azərbaycan yalnız fiziki infrastrukturun deyil, həm də rəqəmsal nəqliyyat texnologiyalarının inkişafı sayəsində Orta Dəhlizi ağıllı, şəffaf və etibarlı logistika ekosisteminə çevirməkdə qərarlıdır.
Məsələ ilə bağlı Milli Məclisin deputatı Tənzilə Rüstəmxanlı Crossmedia.az-a açıqlama verib :
"Azərbaycan Avrasiyada həm "Şərq-Qərb", həm də "Şimal-Cənub" nəqliyyat dəhlizlərinin əsas iştirakçılarındandır. Ölkəmiz yüklərin Asyiadan Avropanın müxtəlif istiqamətlərinə təhlükəsiz və ən əlverişli imkanlar daxilində daşınması üçün rahat tranzit marşurutu yaradıb. Xəzər dənizi, Beynəlxalq Dəniz Ticarəti Limanı, "Bakı-Tbilisi-Qars" dəmir yolu, Ələt Azad İqtisadi Zonasının yaratdığı imkanlar bir daha təsdiq edir ki, Azərbaycan Qafqazda ən əlverişli nəqliyyat-tranzit ölkəsidir.
İkinci Qarabağ müharibəsindəki Zəfərin yaratdığı reallıq və Zəngəzur dəhlizi ilə bağlı ABŞ-də əldə olunmuş razılaşma isə Azərbaycanı Orta dəhlizin daha səmərəli və etibarlı marşrut ölkəsinə çevirib.
Zəngəzur dəhlizi regionda, Avrasiyada və qlobal səviyyədə yeganə stabil tranzit xəttidir ki, Azərbaycandan keçir. Bu baxımdan Orta Dəhliz yalnız quru bağlantısı deyil, həm də Xəzər dənizini okeanlar və böyük dənizlər üzərində daha hegemon vəziyyətə gətirir".
Deputat həmçinin Orta Dəhliz, Xəzər dənizi və Ələt ticarət limanı yenilikçi bir layihə kimi Panama kanalı, Süveyş kanalı və Malakka boğazını əvəz edə biləcək potensiala malik olduğunu qeyd edib:
"Orta Dəhliz və ya Zəngəzur dəhlizinin funksional olması nəticəsində Azərbaycan dünyanın əsas logistik və nəqliyyat açarlarından birinin üzərində yerləşir. Bugünkü dünya siyasi düzənində əsas məsələ budur ki, kim nəqliyyat və logistika xətlərinə nəzarət edir, o, bölgədə söz sahibidir. Bu, Azərbaycanın strateji üstünlüyünü təmin edən əsas amildir".
Elmir Heydərli
17:35 11.10.2025
Oxunuş sayı: 18947
