TDT-nin hərbi komponentinin gücləndirilməsi tamamilə məqsədəuyğundur- Deputat
Türk Dövlətləri Təşkilatının (TDT) Qəbələ zirvə görüşü bir çox istiqamətdə daha geniş ortaq imkanlar vəd edir. Türkiyə Prezidenti Rəcəb Tayyib Ərdoğanın TDT-nin yaxın regionlarda baş verən müharibələrlə bağlı mövqe ortaya qoymalı olduğu fikri, təşkilatın regional və beynəlxalq proseslərdə daha fəal, təsirli aktora çevrilməsi zərurətini gündəmə gətirir. Bu mövqe, TDT-nin yalnız mədəni və iqtisadi əməkdaşlıq platforması olmaqdan çıxaraq, təhlükəsizlik, geosiyasi sabitlik və regional inteqrasiya sahələrində də söz sahibi olmasına şərait yarada bilər. Belə bir yanaşma, təşkilatın həm öz daxilində birliyi gücləndirə, həm də beynəlxalq miqyasda nüfuzunu artıraraq üzv ölkələr üçün strateji vəd daşıyan yeni imkanlar aça bilər.
Mövzu ilə bağlı Milli Məclisin deputatı Tural Gəncəliyev Crossmedia.az saytına açıqlama verib:
“TDT-nin 2026-cı ildə hərbi təlimlərinin Azərbaycanda keçirilməsi ilə bağlı cənab Prezident tərəfindən Qəbələdə səsləndirilən fikir son dərəcə mühüm bəyanatdır. Çünki hazırkı dövrdə dünyada baş verən geosiyasi təlatümlər və tektonik dəyişikliklər fonunda TDT hərbi müdafiə və təhlükəsizlik məsələlərinə xüsusi diqqət yetirməlidir. Artıq elə bir mərhələyə çatmışıq ki, təəssüf doğuran reallıq ondan ibarətdir: hərbi güc və müdafiə potensialı olmadan təhlükəsizliyi təmin etmək mümkün deyil. Təşkilatın coğrafi yerləşməsinə nəzər saldıqda bu zərurət daha aydın görünür. Şimalda Rusiya ilə NATO arasında qarşıdurma günbəgün dərinləşir, cənubda – Yaxın Şərqdə böhran təhlükəli eskalasiya mərhələsinə qədəm qoyur. Şərq istiqamətində isə Çin və onun ətrafında gedən proseslər Qərblə gərginliyin artmasına, hətta gələcəkdə hərbi toqquşma riskinin yaranmasına gətirib çıxara bilər. Hazırda iqtisadi və ticarət sahəsində müşahidə olunan rəqabət mühitinin yaxın gələcəkdə Tayvan məsələsi fonunda hərbi müstəviyə keçməsi istisna deyil”.
“Belə bir şəraitdə TDT-nin hərbi komponentinin gücləndirilməsi tamamilə məqsədəuyğun və məntiqlidir. Bu, təkcə regional deyil, həm də qlobal təhlükəsizlik baxımından rasional addımdır. Dünyanın aparıcı beynəlxalq ittifaqları – istər NATO, istər Avropa İttifaqı olsun – hazırda öz hərbi təhlükəsizlik siyasətlərinə ciddi şəkildə yenidən baxır. Məsələn, ABŞ-da Donald Trampın hakimiyyətə qayıdışından sonra NATO üzvləri qarşısında ÜDM-in 5 faizini müdafiə xərclərinə yönəltmək tələbi qoyulub. Eyni zamanda Avropa ölkələri, xüsusilə Almaniya, Polşa, Skandinaviya dövlətləri və Rumıniya öz hərbi büdcələrini əhəmiyyətli dərəcədə artırıblar. Rusiya ilə gərginliyin artdığı bir vaxtda müasir müharibələrin xarakteri də dəyişir — artıq “dronlar dövrü” başlanıb, yeni texnologiyaların tətbiqi müharibələrin dinamikasını formalaşdırır. Avropanın hava məkanı sabit deyil, hava limanları və infrastruktur dron təhlükəsi ilə üz-üzə qalır. Bütün bu reallıqlar bir daha göstərir ki, Türk Dövlətləri Təşkilatı da hərbi güc elementi ilə möhkəmlənməli, öz müdafiə sistemini müasir çağırışlara uyğun şəkildə formalaşdırmalıdır. Çünki bu coğrafiya zəngin təbii resurslara – neft, qaz, uran, qızıl yataqlarına, strateji əhəmiyyət daşıyan taxıl və su ehtiyatlarına malikdir. 2025-ci il etibarilə Türk Dövlətləri Təşkilatına üzv ölkələrin ümumi daxili məhsulu artıq 2 trilyon dolları keçib və bu göstəricinin artmaqda davam edəcəyi şübhəsizdir. Odur ki, bu qədər potensiala, sərvətə və strateji əhəmiyyətə malik Türk dünyasının təhlükəsizliyinin təmin olunması üçün güclü, koordinasiyalı və birləşmiş Türk Ordusunun formalaşması həyati zərurətə çevrilib. Belə bir güc yalnız regionun deyil, bütün Avrasiya məkanının sabitliyi və sülhü üçün mühüm təminat rolunu oynayacaq",- o əlavə edib.
Ayhan
22:45 08.10.2025
Oxunuş sayı: 7249
