Bu sammit türk birliyinin artıq praktik mərhələyə qədəm qoyduğunu göstərir - Deputat
Müasir dünyada qlobal proseslər fonunda regional birliklərin əhəmiyyəti getdikcə artır. Türk Dövlətləri Təşkilatının fəaliyyətinin genişlənməsi və üzv ölkələr arasında əməkdaşlığın dərinləşməsi bu tendensiyanın bariz nümunəsidir. Xüsusilə Qəbələdə keçirilən sammit türk dünyasının həm siyasi, həm də mənəvi birliyinin təcəssümünə çevrilib. Bu zirvə, ortaq tarixi-mədəni köklərə əsaslanan əməkdaşlığın yeni – daha praktik və strateji mərhələyə keçidini nümayiş etdirir.
Mövzu ilə bağlı Crossmedia.az-a Milli Məclisin deputatı Aydın Hüseynov açıqlama verib: "Qəbələ bu gün türk dünyasının siyasi və mənəvi birliyinin rəmzinə çevrilib. Türk Dövlətləri Təşkilatının sammitinin burada keçirilməsi təsadüfi deyil. Azərbaycanın qədim tarixi, zəngin mədəniyyəti və strateji mövqeyi onu türk dünyasının təbii mərkəzinə çevirib. Qəbələdə bir araya gələn türk dövlətlərinin liderləri təkcə ortaq tarix və dilin deyil, həm də müasir dövrün çağırışları qarşısında birgə məsuliyyətin daşıyıcılarıdır".
Deputat qeyd edib ki, bu sammit türk birliyinin artıq praktik mərhələyə qədəm qoyduğunu göstərir: "Qlobal miqyasda geosiyasi dəyişikliklərin baş verdiyi bir zamanda türk ölkələrinin ortaq səylərlə regional sabitliyə, enerji təhlükəsizliyinə və iqtisadi əməkdaşlığa yönəlməsi böyük əhəmiyyət daşıyır. Sammitin “Regional sülh və təhlükəsizlik” mövzusuna həsr olunması da təsadüfi deyil – bu, türk dövlətlərinin həm öz regionlarında, həm də beynəlxalq arenada məsuliyyətli aktor kimi çıxış etmək niyyətini əks etdirir".
Aydın Hüseynov bildirib ki, Azərbaycanın ev sahibliyi etdiyi bu zirvə ölkəmizin türk dünyasında artan nüfuzunu bir daha nümayiş etdirir: "Azərbaycan bu gün həm enerji siyasətində, həm də nəqliyyat-kommunikasiya sahəsində türk dünyasını birləşdirən əsas həlqəyə çevrilib. Zəngəzur dəhlizinin reallaşması, Orta Dəhliz layihəsinin genişlənməsi və ortaq iqtisadi platformaların yaradılması istiqamətində aparılan müzakirələr bu birliyin gələcəyinə yeni nəfəs gətirəcək".
Milli Məclisin deputatı vurğulayıb ki, Qəbələ sammiti təkcə dövlət başçılarının görüşü deyil, həm də türk xalqlarının qəlbən birləşdiyi mənəvi hadisədir: "Bu görüş türk birliyinin siyasi, iqtisadi və mədəni dayaqlarını möhkəmləndirir, ortaq gələcəyə olan inamı artırır. Azərbaycanın səsi bu gün türk dünyasının ortaq səsinə çevrilib və Qəbələ zirvəsi bu birliyin gələcəyə doğru atılmış mühüm addımı kimi tarixə düşəcək".
Xumar Emilqızı
17:58 07.10.2025
Oxunuş sayı: 6160
