“Gürcüstanda hakimiyyətlə müxalifət arasında gərginlik geosiyasi rəqabətin nəticəsi kimi dərinləşir”- Ekspert
Gürcüstan parlamentinin spikeri Şalva Papuaşvili seçki prosesinə təxribat yolu ilə təsir göstərmək cəhdlərinin müşahidə olunduğunu bildirib. Onun sözlərinə görə, bəzi qüvvələr seçki hüququnu məhdudlaşdırmaq və prosesi sabotaj etməyə çalışır. Sabah 64 bələdiyyə sədri və 2000-dən çox bələdiyyə şura üzvü seçiləcək. Seçkiləri izləmək üçün 28 beynəlxalq və 27 yerli müşahidə təşkilatı, həmçinin 70-dən çox media qurumu qeydiyyatdan keçib. Spiker qeyd edib ki, seçkiqabağı mühit əsasən sakit keçib.
Gürcüstanda seçkilər öncəsi təxribat iddiaları siyasi mübarizənin gərginliyini göstərir. Belə halların baş verməsi seçkilərin legitimliyinə kölgə sala bilər. Lakin beynəlxalq və yerli müşahidəçilərin iştirakı prosesin şəffaflığını təmin etmək baxımından mühüm rol oynayacaq.
Onun səsləndirdiyi fikirlər barədə politoloq Turab Rzayev Crossmedia.az-a açıqlama verib.
Politoloq, Gürcüstandakı etirazların ritorikası və tələbləri əvvəlkindən daha sərt xarakter aldığını bildirib:
“Gürcüstanda qarşıdurmaların baş verəcəyi əvvəlcədən gözlənilirdi. Bunun bir neçə səbəbi var. Birinci səbəb geosiyasi amillərlə bağlıdır. Gürcüstan geosiyasi qırılma xəttində, xüsusilə də Qərb təsir dairəsində yerləşir. Artıq Ukraynada bu mübarizə qanlı mərhələyə keçib, Moldovada isə Qərb seçkilərdə Rusiyaya qalib gəlib. Gürcüstanda isə hazırda Rusiyameyilli qüvvələr hakimiyyətdədir və Qərb burada revanş almağa çalışır. Hazırda hakimiyyət öz mövqeyini qoruyur, müxalifət isə parçalanmış vəziyyətdədir. Faktiki olaraq, müxalifət dörd partiyaya bölünüb və onların bəziləri seçkilərə qatılıb-qatılmamaqla bağlı qərarsızlıq içindədir. Bu da müxalifətin zəifləməsinə və Gürcüstan hökumətinə qarşı real təzyiq imkanlarının azalmasına gətirib çıxarıb. Hakimiyyət isə bunu əsas gətirərək deyir ki, müxalifət kifayət qədər iştirak edib və seçkilər legitim sayılmalıdır”.
Ekspertin sözlərinə görə, real müxalifət qüvvələrinin bir hissəsi seçkiləri boykot edib: “Onlar arasında Saakaşvilinin partiyası – “Vətəndaş Hərəkatı” da xüsusi rol oynayır. Maraqlıdır ki, əvvəlcədən gözlənilirdi: parlament seçkilərindən sonra ciddi etirazlar baş verməyəcək, müxalifət yalnız seçkiləri etibarsız saymaqla kifayətlənəcək. Ancaq bu dəfə hadisələr fərqli inkişaf edib – artıq böyük şəhərlərdə qarşıdurmalar və etiraz aksiyaları müşahidə olunur. Etirazların ritorikası və tələbləri əvvəlkilərdən daha sərtdir. Keçən seçkilərdə əsas tələblər yenidən seçki keçirilməsi və bəzi qanunların ləğvi idi. Bu dəfə isə həm tələblər, həm də etirazçıların davranışları daha radikaldır. Bu, onu deməyə əsas verir ki, Qərb dairələrinin müəyyən qüvvələrə Gürcüstanda hakimiyyətə qarşı mübarizədə dəstək və ya ən azı mənəvi dayaq verdiyi ehtimal olunur. Eyni zamanda, etirazçı liderlər Moldovadakı seçkilərin nəticələrindən və oradakı proseslərdən ilham almış kimi görünürlər. Nəticədə Gürcüstandakı etirazların ritorikası və tələbləri daha sərtləşib və bu vəziyyət, böyük ehtimalla, etirazçılarla təhlükəsizlik qüvvələri arasında daha şiddətli toqquşmalara gətirib çıxara bilər”.
Nicat Rüstəmzadə
22:54 06.10.2025
Oxunuş sayı: 7875
