Türkiyə və İran müdafiə nazirləri bir araya gəldi: Regionda nələr dəyişəcək?
Türkiyə və İran müdafiə nazirləri
Ankarada görüşüb.
Milli müdafiə naziri Yaşar Gülər ölkəsində
səfərdə olan İranın müdafiə naziri Əziz Nasirzadəni Nazirlikdə hərbi mərasimlə
qarşılayıb.
Qarşılama mərasimindən sonra heyətlər
arası görüş keçirilib.
Məlum olduğu kimi, Ankara və Tehran
regionun iki mühüm aktorudurlar. Tərəflər arasında müxtəlif səviyyələrdə müntəzəm
dialoq var.
Türkiyə və İranın regional təhlükəsizlikdə
oynadıqları rol barədə Crossmedia.az-a danışan hərbi ekspert İbrahim Rüstəmli bildirib ki, Türkiyə ilə İran müdafiə
nazirinin görüşməsi, müzakirələr aparması ümumiyyətlə məqbul sayılır: "İki müsəlman dövlətinin bir-birinin
yanında olması çox önəmlidir. Hazırda İraqda, Suriyada, Liviyada üçüncü səlib
yürüşü həyata keçirilir və bütün müsəlman ölkələrində münaqişə ocaqları
yaradılıb. Bu münaqişə ocaqları isə bizə, dünyaya heç bir şey vəd etmir. Eyni
zamanda, qısa müddətli olsa da İranla İsrail arasında da çox ciddi konflikt
yarandə. Və bu konfliktin sonrakı mərhələsində eskalasiyaya çevrilməsi dünya
üçün yaxşı hal sayılmır. Ona görə də əsasən deyirlər ki, ən pis sülh ən yaxşı
müharibədən yaxşıdır. Türkiyə ilə İranın müdafiə nazirlərinin görüşməsi iki
dövlət arasındakı əlaqənin genişlənməsi istiqamətində irəli addımdır. Hazırda
İranla Azərbaycan arasında müsbət münasibətlər inkişaf edir. Burada hər iki ölkənin
prezidentinin səyləri yüksək dəyərləndirilir. Eyni zamanda, Türkiyə ilə İran
arasında bu kimi görüşlərin keçirilməsi beynəlxalq region üçün böyük əhəmiyyət
daşıyır. Bu tip görüşləri bir sıra Avropa və Qərb ölkələri arzuolunan saymır,
amma İran və Türkiyə müstəqil siyasət həyata keçirən iki müsəlman ölkəsidir. Hər
iki dövlətin müdafiə nazirinin görüşməsi, əvvəla, irəliyə doğru addımdır.
İkincisi, sülhə və əməkdaşlığa doğru bir addımdır".
İ.Rüstəmli vurğulayıb ki, bu görüşdə “gözləntilər nələrdir?” sualına cavab vermək üçün konkret protokola sahib olmaq lazımdır: "Təbii ki, burada media üçün nəzərdə tutulmayan məsələlər var. Hər halda görüş sülh və əmin-amanlığa doğru əlaqələrin genişlənməsinə, müharibə eskalasiyasının nisbətən də olsa daralmasına xidmət edəcək. Bu görüş iki dövlət arasındakı münasibətlərin müsbət dinamika ilə inkişafına, daha etibarlı şəkildə qurulmasına kömək edəcək. Eyni zamanda, müdafiə nazirləri görüşdə hərbi məsələləri önə çıxaracaq, qarşılıqlı hərbi-ticari əlaqələrin genişləndirilməsi və Türkiyə ilə İran müdafiə nazirləri arasında digər əhəmiyyətli məsələlər müzakirə oluna bilər. Yəni İranla Türkiyə arasındakı əlaqələrin genişlənməsi protokol üzrə aparılır. Bunun beynəlxalq hüquq çərçivəsinə uyğunlaşdırılması isə iki dövlət arasında imzalanan rəsmi sənədlərdən asılıdır. Hər halda, əgər bu gün müdafiə nazirləri görüşürlərsə, gələn dəfə prezidentlər də görüşə bilər. İranla Türkiyə arasında müsbət dinamik inkişafda Azərbaycanın rolu çoxdur".
Eksoert əlavə edib ki, Türkiyə
prezidenti Rəcəb Tayyib Ərdoğanın, Azərbaycan prezidenti İlham Əliyevin, İran
prezidenti Məsud Pezeşkianın bir masa ətrafında oturması, əlbəttə, sonrakı sülh
hadisələrində müsbət dinamikanı göstərib: "Buradan əsas gözləntilər
regional təhlükəsizliyə töhfə verəcək. Bu tip görüşlər ölkələrarası münasibətlərə
müsbət təsir göstərir. Bu görüş kifayət qədər produktiv olacaq. Burada bəzi
protokollar var. Bu protokollar üçün də gözlənilməz nəticələr ola bilər. O mənada
ki, Azərbaycan, Türkiyə və İranın yaxınlaşması üç mənəvi, mədəni, milli
baxımdan son dərəcə bir-birinə yaxın olan xalqın birliyi üçün böyük əhəmiyyət
daşıyır".
Türkan Kərimli
19:12 02.10.2025
Oxunuş sayı: 9056
