Azərbaycan- Türkiyə əlaqələrinə zərbə vurmaq istəyənlər var: İsrail "kartı"masadadır
"Türkiyədə vaxtaşırı üzə çıxan,
xüsusən də Azərbaycan-İsrail münasibətləri ətrafında uydurulan neqativ medianın
əhəmiyyətli bir hissəsi xarici dairələrin manipulyasiyalarıdır".
Bu fikirləri Crossmedia.az-a
açıqlamasında türkiyəli politoloq, professor Mehmet Yüce deyib.
O bildirib ki, bu cür xəbərlər,
böhtanlar türk millətinin duyğu və düşüncələrini əks etdirmir; əksinə, iki
qardaş ölkə arasında nifaq salmaq məqsədi güdür: "Ona görə də medianın və
ictimaiyyətin bu cür cəhdlər qarşısında daha şüurlu, həssas və məsuliyyətli
davranması Türkiyə-Azərbaycan qardaşlığının gələcəyi üçün həyati əhəmiyyət kəsb
edir. İki ölkə arasında əlaqələr o qədər güclüdür ki, bu cür yalan və
düşünülmüş xəbərlər Türkiyə ilə Azərbaycan arasındakı qardaşlıq bağına xələl gətirə
bilməyəcək. Bunun səbəbi iki ölkə arasındakı münasibətlərin səthi şəxsi
maraqlardan kənar, ortaq tarix, mədəniyyət və dəyərlər üzərində qurulmasıdır.
“İki dövlət, bir millət” təfəkkürü ilə formalaşan bu dərin bağı dövri təbliğat
və kənar manipulyasiyaların təsiri ilə sarsıtmaq olmaz. Əksinə, bu cür təşəbbüslər
qardaşlığın və onu narahat edən qrupların gücünü bir daha nümayiş
etdirir".
"Üstəlik, Türkiyə-Azərbaycan münasibətlərinə həssas yanaşmaq hər kəsin ortaq məsuliyyətidir. Bu bağ təkcə diplomatik və siyasi müstəvidə deyil, həm də tarixi, mədəni və sosial əsasları ilə dərinləşir. “İki dövlət, bir millət” zehniyyəti çərçivəsində iki ölkə arasında ən kiçik qırılma belə strateji təhlükə hesab edilməlidir. Buna görə də ictimaiyyət arasında yarana biləcək yanlış təsəvvürlərə qarşı ayıq olmaq və qardaşlıq bağlarını qorumaq çox vacibdir", - müsahibimiz əlavə edib.
Kənan Novruzov
21:54 01.10.2025
Oxunuş sayı: 12697
