Məişət zorakılığının qarşısının alınması üzrə monitorinq və əlaqələndirmə qrupunun növbəti iclası keçirilib
Azərbaycan Respublikasının Nazirlər Kabinetinin 2024-cü il 30 iyul tarixli Qərarına əsasən Ailə, Qadın və Uşaq Problemləri üzrə Dövlət Komitəsi tərəfindən yaradılan monitorinq və əlaqələndirmə qrupunun növbəti rüblük iclası keçirilib.
Dövlət Komitəsindən Crossmedia.az-a bildirilib ki, iclasda monitorinq qrupunun üzvləri ilə yanaşı, Vəkillər Kollegiyasının və Ombudsman Aparatının, Dövlət Statistika Komitəsinin, Tibbi Ərazi Bölmələrinin İdarəetmə Birliyinin nümayəndələri, o cümlədən Bakı şəhərinin Sabunçu və Binəqədi rayonları, habelə Sumqayıt Şəhər İcra Hakimiyyəti başçılarının müavinləri yerli monitorinq və əlaqələndirmə qruplarının sədrləri qismində iştirak ediblər.
Məişət zorakılığı ilə bağlı ölkədə rezonans yaradan faktlar və üç aylıq hesabat, yerli monitorinq qruplarının məişət zorakılığının qarşısının alınması zamanı fəaliyyətlərində yaranan çətinliklər, eləcə də onların həlli yollarının müzakirəsi iclasın gündəliyində duran əsas məsələlərdən olub.
İclasda, həmçinin qurumlararası əlaqələndirmənin möhkəmləndirilməsi, bütün rayon və şəhərlər üzrə münaqişəli ailələrin siyahısının müəyyənləşdirilməsi, təhlillərin aparılması və münaqişəli ailələrlə profilaktiki işin gücləndirilməsi, habelə yerli polis bölmələrinin əməkdaşlarına məişət zorakılığının qarşısının alınması ilə bağlı təlimlərin keçirilməsi kimi bir çox məsələlər ətrafında həm qrup üzvləri, həm də qonaqlar tərəfindən ətraflı müzakirələr aparılıb, müvafiq təklif və tövsiyələr verilib.
17:02 01.10.2025
Oxunuş sayı: 8555
