Güzəştin birdən-birə ləğv edilməsi 7 ildə əldə olunmuş nailiyyətlərin zəifləməsinə səbəb olacaq - Açıqlama
2026-cı ildən veriləcək qərarla qüvvəyə minəcək 14% lik güzəştin ləğvi, müddət uzadılmayacağı təqdirdə kiçik və orta sahibkarlıq sektoruna ciddi təhdidlər yarada bilər. 2019-cu ildən qüvvədə olan və qeyri-dövlət sektorunda çalışanların 8.000 manata qədər əməkhaqqını gəlir vergisindən azad edən qərar gələn ilin əvvəlində ləğv edilir. 2026-cı ildə Azərbaycanda dövlət büdcəsi gəlirlərinin 2 milyard 567 milyon manatı fiziki şəxslərin gəlir vergisi üzrə daxilolmaların payına düşəcəyi proqnozlaşdırılır. Bu isə bu illə müqayisədə 29,05 % çoxdur.
Mövzu ilə bağlı İş adamları Cəmiyyətinin Milli Assosiasiyasının İdarə Heyəti üzvü Abbas Orucəliyev Crossmedia.az-a açıqlama verib: “Vergi Məcəlləsinin 101.1-1 maddəsinə əsasən, Azərbaycanda özəl sektorda çalışan muzdlu işçilər üçün tətbiq edilən gəlir vergisi güzəştinin müddəti 2026-cı il yanvarın 1-də başa çatır. 2026-cı ildə Azərbaycanda dövlət büdcə gəlirlərinin təxminən 2 milyard 567 milyon manatının fiziki şəxslərin gəlir vergisi üzrə daxilolmalarının payına düşəcəyi ehtimalı, güzəşt müddətinin artırılmayacağından xəbər verir. Güzəştin birdən-birə ləğv edilməsi təəssüf ki, 7 ildə əldə olunmuş nailiyyətlərin zəifləməsinə səbəb olacaq. Bu baxımdan, güzəştin tam ləğvi əvəzinə mərhələli azaltma mexanizminin tətbiq edilməsi məqsədəuyğun olardı. Belə yanaşma həm büdcə gəlirlərinin tədricən artırılmasına, həm də özəl sektorun, xüsusi ilə KOB-ların fəaliyyətində kəskin tənəzzülün qarşısının alınmasına imkan verəcəkdir”.
Ayhan
18:02 29.09.2025
Oxunuş sayı: 11401
