Paşinyan növbədənkənar seçki mesajı ilə düşmənlərini çaşdırır
Erməni mediası xəbər verir ki, Ermənistanın baş naziri Nikol Paşinyan növbədənkənar seçkilərə gedəcək. Bu addım Paşinyanın siyasi perspektivini özü üçün müəyyən etdiyini göstərir. Ölkə daxilindəki vəziyyət onun üçün qənaətbəxş olmasa da, Paşinyan həm düşmənlərini, həm də müttəfiqlərini yaxşı tanıyır və manevr imkanlarını hələ də qoruyub saxlayır. Növbədənkənar seçki onun üçün yalnız siyasi risk deyil, həm də rəqibləri çaşdırmaq və vəziyyəti öz xeyrinə yönləndirmək imkanıdır. Eyni zamanda, Paşinyan sülh və regional əməkdaşlığa açıq olduğunu göstərir, xüsusilə Azərbaycanla iqtisadi və ticarət münasibətlərinin inkişafına hazırlığını bəyan edir. Lakin bu gediş düşmənlərinin qarşısında ciddi narazılıq doğurur və Ermənistanın siyasi vəziyyətini daha mürəkkəb hala gətirir. Beləliklə, növbədənkənar seçkilərin keçirilməsi həm Paşinyanın strateji manevr qabiliyyətini, həm də Ermənistanın daxili və regional siyasətinin mürəkkəbliyini ortaya qoyur.
Mövzu barədə Crossmedia.az saytına açıqlama verən politoloq Tofiq Abbasov bildirib ki, Nikol Paşinyan artıq demək olar ki, növbədənkənar seçkilərə gedirsə, o, siyasi perspektivi özü üçün müəyyən edib. “Çünki ölkə daxilindəki vəziyyət ona o qədər də qənaətbəxş deyil. Faktiki olaraq bəzi daxili və xarici qüvvələr çalışırlar ki, Nikol Paşinyanı hakimiyyətdən uzaqlaşdırsınlar, yəni seçkilərə qədər bu prosesi sürətləndirsinlər”.
O əlavə edib ki, Paşinyan həm düşmənlərini, həm də dostlarını yaxşı tanıyır və əlindəki imkanlarla qarşı tərəfi çaşqın vəziyyətə sala bilər. “Əgər o həqiqətən növbədənkənar seçkilərə gedəcəksə, bu, o deməkdir ki, vəziyyəti real qiymətləndirir və həmin vəziyyət ona yaxşı dönüş vəd etmir. Prinsip etibarilə Paşinyanın hələ də manevr imkanları tükənməyib".
Abbasov qeyd edib ki, Paşinyan 2018-ci ildən hakimiyyətdədir və bu, onu göstərir ki, kifayət qədər siyasi səriştə toplayıb: “Əgər belə bir şərait varsa, o çalışacaq ki, qarşı tərəfləri qeyri-adi gedişlə çaşdırsın. Növbədənkənar seçki baş tutarsa, o, bu variantın bütün hazırlıqlarını həyata keçirə bilər”.
Politoloq həmçinin Paşinyanın sülhə açıq olduğunu da vurğulayıb: “O deyir ki, biz bölgədə sülh istəyirik, Azərbaycanla birləşməliyik. Parlamentin sədri Alen Simonyan bildirir ki, hətta komersiya münasibətlərinə hazır olmalıyıq – Azərbaycanın malları Ermənistanda, bizim mallarımız isə Azərbaycanda satılsın”.
Lakin Abbasov əlavə edib ki, Paşinyanın düşmənləri, əsasən, hakimiyyəti itirmiş Qarabağ klanıdır və onlar Baş naziri təslimçi siyasət yürütməkdə ittiham edirlər: “Buna görə də Ermənistanın bölgədəki vəziyyəti mürəkkəbləşir. Paşinyan isə bütün prosesləri hamıdan yaxşı hiss edir və bilir. Əsas sual budur: Nikol Paşinyan manevr imkanlarını necə istifadə edəcək, hansı addımla öz aponentlərini həm tərkislah edəcək, həm də uduşlu vəziyyətə məcbur edəcək?"
Mehriban Yariyeva
19:47 17.09.2025
Oxunuş sayı: 6618
