Güclü rəqib üzərində əldə edilən bu nəticə yeni mərhələnin başlanğıcıdır -AÇIQLAMA
Ağdamın “Qarabağ” klubu Çempionlar Liqasının əsas mərhələsində Azərbaycan futbolu adına daha bir tarixi uğura imza atıb. Komanda dünən keçirilən oyunda Avropanın ən güclü klublarından biri sayılan Portuqaliyanın “Benfika”sı üzərində əzmkar qələbə qazanaraq həm azarkeşlərini sevindirib, həm də ölkə futbolunun gücünü bir daha nümayiş etdirib.
Əzmkar qələbə ilə bağlı Crossmedia.az-a açıqlama verən "Qol.az" idman saytının baş redaktoru, Əməkdar jurnalist Aydın Bağırov oyunla bağlı təəssüratlarının yüksək olduğunu qeyd edib: “Əlbəttə, təsüratlarım çox yüksəkdir. Bütün azərbaycanlılar kimi mən də bu qələbəni böyük sevinc və qürur hissi ilə qarşılayıram. Bu uğur Azərbaycan futbolu üçün tarixi hadisədir. Çempionlar Liqasının qrup mərhələsində qazanılmış ilk qələbə kimi yaddaşlara həkk olundu".
Əməkdar jurnalist həmçinin güclü rəqib üzərində əldə edilən bu nəticənin, yeni mərhələnin başlanğıcı olduğunu bildirib.
"Güclü rəqib üzərində əldə edilən bu nəticə, yeni mərhələnin başlanğıcıdır. Ümumilikdə təəssüratlarım olduqca müsbətdir və Qarabağa növbəti oyunlarda uğurlar arzulayıram" - deyə o bildirib.
Elmir Heydərli
15:49 17.09.2025
Oxunuş sayı: 3526
