Elmar Məmmədyarov: Proses başlayıb, Minsk Qrupu buraxılır
Azərbaycanın xarici işlər naziri Ceyhun Bayramov Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Maqdalena Qrononu qəbul edib.
Görüş zamanı Azərbaycan–Avropa İttifaqı (Aİ) əməkdaşlığının hazırkı vəziyyəti və perspektivləri, Azərbaycan–Ermənistan normallaşma prosesi, habelə regional və beynəlxalq məsələlər müzakirə olunub.
Görüş və onun nəticələri barədə məsələlərə aydınlıq gətirmək üçün Azərbaycanın keçmiş xarici işlər naziri Elmar Məmmədyarov Crossmedia.az-ın suallarını cavablandırıb:
– Azərbaycanın Aİ ilə münasibətlərinin perspektivlərini necə qiymətləndirirsiniz?
– Artıq bilirik ki, enerji sahəsində Azərbaycan Aİ ilə əməkdaşlığı gücləndirib. 10 ölkə ilə strateji əməkdaşlıq istiqamətində işlər görülüb. Nəqliyyat sahəsində də əməkdaşlıq yaxın vaxtlarda daha da inkişaf etdiriləcək.
– Avropadakı bəzi dövlətlərin, xüsusilə Fransanın, gələcəkdə ABŞ-nin dəstəyi ilə Cənubi Qafqazda yaranan yeni reallıqları qəbul edib Azərbaycana qarşı aqressiv ritorikasından əl çəkməsi gözləniləndirmi?
– Əməkdaşlıq, əlbəttə ki, hər kəs üçün faydalı olacaq. Amma bəzi tərəflər üçün xoş qarşılanmaya bilər. Buna baxmayaraq, Azərbaycan artıq ciddi proses başladıb. Sülh mətni ilə bağlı paraflar artıq atılıb və bütün tərəfdaş ölkələr dəstək verib.
– Minsk Qrupunun mümkün ləğvi proseslərə necə təsir edəcək?
– Sentyabrın əvvəlində ATƏT-dəki olan səfirlərin səviyyəsində Minsk Qrupunun buraxılması ilə məsələyə baxılacaq. Çox güman, müsbət qərar qəbul olunacaq. Dekabr ayında isə xarici işlər nazirlərinin səviyyəsində təsdiqləmə prosesi yekunlaşacaq. Prosedur belədir: əvvəlcə səfirliklər təsdiqləyir, sonra isə nazirlər səviyyəsində işçi qrup təsdiqlənir. Orada daimi nümayəndə var və işçi qrup çərçivəsində üç alt qrup fəaliyyət göstərir.
Elmir Heydərli
16:33 29.08.2025
Oxunuş sayı: 2442
