Qəzzadakı müharibə jurnalistlər üçün ən qanlı münaqişə sayılır – AÇIQLAMA
Müharibələr həmişə jurnalistlər üçün ciddi sınaq hesab olunub. Son iki ildir ki, belə qanlı müharibələrdən biri Qəzzada davam edir. Jurnalistlər əllərində kamera, mikrofon döyüş bölgələrinə gedir, öz vəzifələrini yerinə yetirməyə çalışırlar. Ancaq bu, bir çox media nümayəndəsi üçün spnuncu ezamiyyət olur. Müqayisə üçün qeyd edək: İkinci Dünya Müharibəsi dövründə 69, Vyetnam müharibəsində 63, Koreya müharibəsində isə 17 jurnalist həlak olmuşdu. Ukrayna-Rusiya müharibəsində indiyədək 17 media nümayəndəsi həyatını itirib. Ancaq Qəzzada cəmi iki il ərzində 250-yə yaxın jurnalistin öldürülməsi bu rəqəmləri dəfələrlə üstələyir. Təbii ki, bu vəziyyət heç bir halda normal qarşılanmamalıdır. Cəmiyyəti məlumatlandıran və informasiya təmin edən jurnalistlərə qarşı bu cür hallar yolverilməzdir.
Məsələ ilə bağlı Crossmedia.az-a açıqlama verən Azərbaycan Mətbuat Şurasının İdarə Heyətinin üzvü Hacıbəy Heydərli Qəzzada baş verən hadisələrin, xüsusilə də jurnalistlərin hədəfə alınmasının, müasir dövrün ən ağır və qanlı faciələrindən biri olduğunu vurğulayıb: “Qəzzada baş verənlər, xüsusilə də jurnalistlərin hədəf alınaraq kütləvi şəkildə öldürülməsi, müasir dövrün ən ağır və qanlı faciələrindən biridir. Tarixi müqayisələr də göstərir ki, heç bir müharibədə bu qədər qısa müddətdə bu sayda media nümayəndəsi həyatını itirməyib. Jurnalistlərin vəzifəsi hadisələri işıqlandırmaqdır. Onlar müharibənin real üzünü, insan faciələrini, baş verənləri dünyaya çatdırmaq üçün həyatlarını riskə atırlar. Belə bir peşə qrupunun kütləvi şəkildə hədəf alınması əslində həm də həqiqətin öldürülməsi deməkdir”.
H.Heydərli həmçinin beynəlxalq təşkilatların bu cür hadisələrə laqeyd qalmamalı və qəti mövqe ortaya qoymalı olduğunu bildirib: “Jurnalistlərin təhlükəsizliyi beynəlxalq hüquqla qorunur. Beynəlxalq təşkilatlar bu cinayətlərə laqeyd qalmamalı, qəti mövqe ortaya qoymalıdır. Qəzzada baş verənlər yalnız insanlığa deyil, həm də söz və informasiya azadlığına qarşı cinayətdir” .
Elmir Heydərli
14:05 29.08.2025
Oxunuş sayı: 1060
