Azərbaycanla Ermənistan arasında sülhün region üçün mühüm üstünlükləri olacaq - Deputat
Məlum olduğu kimi, avqustun 8-də Vaşinqtonda ABŞ vasitəsilə Azərbaycan və Ermənistan liderləri arasında görüş keçirildi. Görüş zamanı müzakirə olunan əsas məsələlərdən biri də ATƏT-in Minsk qrupunun ləğvi idi. Artıq bununla bağlı ilin sonuna qədər bu qrupun ləğvi nəzərdə tutulur. Bununla bağlı həmsədr dövlətlər də öz fikirlərini bildirməyə başlayıb. Həmsədr dövlətlərdən olan şimal qonşumuz Rusiya da Azərbaycan və Ermənistanın ATƏT-in Minsk qrupunun buraxılması ilə bağlı birgə qərarını dəstəkləyib.
Maraqlıdır, həmsədr dövlətlərdən biri olan Rusiyanın bu cür yanaşması ATƏT-in Minsk qrupunun ləğvini sürətləndirə bilərmi?
Məsələ ilə bağlı Crossmedia.az-a açıqlama verən Milli Məclisin deputatı Aydın Hüseynov Rusiyanın müsbət rəy bildirməsinin əsas məqsədinin regiondakı reallıqları nəzərə almasından irəli gəldiyini qeyd edib:
“Birinci növbədə onu qeyd edək ki, artıq Minsk qrupunun heç bir fəaliyyəti yoxdur, çünki Minsk qrupu Qarabağ məsələsinin həlli ilə bağlı yaradılmışdı. İndi isə Qarabağ adlı bir problem olmadığını nəzərə alsaq, Minsk qrupu hansı işləri görəcək? Əlbəttə ki, heç bir işi görməyəcək. Minsk qrupunun ləğv olunması Azərbaycanın irəli sürdüyü bir tələbdir. Ermənistanla Azərbaycan arasında dayanıqlı sülhün əldə olunması üçün əsas şərtlərdən biri bu qrupun ləğvidir. Bununla bağlı Azərbaycan və Ermənistanın müraciətləri kifayət edir. Bu barədə Ermənistan da artıq öz müsbət münasibətini bildirib. Azərbaycanın mövqeyi isə bəlli idi. Bu artıq bir faktdır ki, bu müraciətlərin fonunda hüquqi baza mövcuddur. Buna görə də Rusiya artıq yaranan reallığı qəbul edir”.
Deputat həmçinin Azərbaycanla Ermənistan arasında əldə olunacaq sülhün region üçün, eləcə də Rusiya üçün iqtisadi üstünlüklərinin olduğunu vurğulayıb: “Əlbəttə, regionda sülhün olmaması digər dövlətlər üçün də önəmlidir. Ermənistanla Azərbaycan arasında olacaq sülh region üçün böyük iqtisadi üstünlükdür. Rusiyanın isə bu proseslərdə iştirakı iqtisadiyyatına təsir göstərəcək. Ona görə də Rusiya bu cür addım atmağı özü üçün də əlverişli bir mühitin formalaşdırılması kimi qiymətləndirir. Nəticə etibarilə Rusiya Minsk qrupunun ləğv olunmasına öz müsbət rəyini bildirir. Onu da qeyd edim ki, bu, artıq hüquqi müstəvidə də öz həllini tapıb”.
Elmir Heydərli
13:21 29.08.2025
Oxunuş sayı: 8020
