Metronun “28 May” stansiyasının platformasını “Cəfər Cabbarlı” ilə birləşdirən piyada tunelinin layihə işləri tamamlanıb
Yeni stansiyaların inşası məqsədilə mərhələli işlər davam etdirilir. Artıq “Yüksel Proje” şirkəti ilə müqavilə imzalanıb. Bura iki istiqamət daxildir: biri - 10 stansiyadan 9-nun və tunellərin layihələndirilməsi, ikincisi Yaşıl və Qırmızı xətlərin ayrılmasının layihələndirilməsi.
Crossmedia.az xəbər verir ki, bu barədə “Bakı Metropoliteni” QSC-nin sədrinin müşaviri Emil Əhmədov “Xocəsən" elektrik deposunda metropolitenə gətirilmiş yeni nəsil qatarların yığılaraq komplektləşdirilməsi prosesi zamanı deyib.
Onun sözlərinə görə, xətlərin ayrılması zamanı “İçərişəhər” stansiyasında keçid kamerası, dönmə tuneli və yeraltı avtomobil dayanacağının layihələndirilməsi də nəzərdə tutulub. O bildirib ki, hazırda layihələndirmə işləri sürətlə davam edir.
“Stansiyaların yerlərinin dəqiqləşdirilməsi və rəsmiləşdirilməsi istiqamətində tədbirlər görülür. Tunel traslarının hazırlanması da sürətlə yerinə yetirilir. Metro inşaatının özəllikləri çoxdur. Sadəcə, inşaat deyil, infrastruktura daxil olan bütün məsələlər nəzərdə tutulmalı, tikinti norma və qaydalarının bütün müddəaları nəzərə alınmalıdır. Xətlərin ayrılması istiqamətində işlərə isə “Dərnəgül” deposu ilə başlanılıb. Hazırda tunellərdə 1 kilometrdən artıq dəmir yollarının çəkilməsi prosesi sürətlə davam edir. Yollar dəmir-beton blok üzərində olacaq. Depo ərazisində qatarlara təmir, qulluq, baxış sahəsində də dəmir-beton işləri görülür. Birinci mərhələdə, 7 belə sahə tam hazır vəziyyətə gətiriləcək”, - deyə E.Əhmədov qeyd edib.
Sədrin müşaviri metronun “28 May” stansiyası yaxınlığında qazma işlərinə də start verildiyini sözlərinə əlavə edib: “Yaxın günlərdə şaxtaların qazıntısına da başlanılacaq. Burada 30 metr dərinliyə qədər şaxta qazılacaq. “Dərnəgül” deposunun birinci mərhələsi başa çatdıqdan sonra isə bu şaxtalardan, əvvəllər elan etdiyimiz, 200 metrədək tunel inşasına başlanılacaq. Xətlərin ayrılması təkcə bundan ibarət olmayacaq. “28 May” stansiyasının platformasını “Cəfər Cabbarlı” stansiyası ilə birləşdirən piyada tuneli də inşa olunacaq. Burada da layihə işləri tamamlanıb və hazırlıq işlərinə başlanılıb. Münasib dövrdə bu tikinti işinə də başlanılacaq. Həmçinin hazırda xətlərin ayrıldıqdan sonra dayanıqlı enerji təminatını verəcək iki elektrik yarımstansiyanın da layihələndirilməsi işləri davam etdirilir”.
O qeyd edib ki, “İçərişəhər” stansiyasının arxasındakı dönmə kamerası ilə bağlı hazırda geoloji kəşfiyyat-axtarış işləri davam etdirilir. Layihələndirmə yekunlaşan kimi həm dönmə kamerası, həm tunel, həm də avtoparkinqlə bağlı məlumatlar təqdim olunacaq.
12:35 29.08.2025
Oxunuş sayı: 477
