Azərbaycanlı iş adamı Şeremetyevodakı ən iri "duty free" biznesini itirib
Azərbaycanlı sahibkar Araz Mehdiyev artıq Moskva Şeremetyevo hava limanındakı ən böyük "duty free" mağazalar şəbəkəsinin sahibi deyil. 25 avqust tarixində "Travel Retail Şeremetyevo" MMC üzərində nəzarət şirkətin son iki ildə baş direktoru olmuş Vitaliy Bavinə keçib.
Crossmedia.az RBK-yə istinadən xəbər verir ki, 2022-ci ildə yaradılmış "Travel Retail Şeremetyevo" hava limanındakı "duty free" və "duty paid" mağazaların əksəriyyətini idarə edir. Bunlara "Max Mara", "Hugo Boss", "Swarovski" kimi butiklər də daxildir. Şirkət 2024-cü ildə gəlirlərini ikiqat artıraraq 12,4 milyard rubla çatdırıb.
Bundan əvvəl Mehdiyev həmçinin Domodedovo hava limanında da aktivlərə və "İmperial Duty Free" şirkətində paylara sahib idi. Lakin 2025-ci ilin yaz və yay aylarında bu aktivlər Marşall adalarında qeydiyyatdan keçmiş offşor şirkətlərə keçib.
İş adamı həmçinin Qod Nisanov və Zarah İliyevə məxsus "Kiyevskaya Ploshad" qrupuna yaxınlığı ilə tanınırdı: 2018-ci ildə o, bu qrupun bir sıra şirkətlərində əvvəllər sahibkar İlham Rəhimova məxsus olan payları əldə etmişdi. Lakin artıq 2019-cu ildə həmin paylar yenidən Rəhimova qaytarılıb.
11:00 29.08.2025
Oxunuş sayı: 830
