Paşinyan xalqı hazırlayır: Yaxın vaxtda konstitusiya dəyişikliyi olacaq - DEPUTAT
Azərbaycan-Ermənistan münasibətlərində sülh prosesinin irəliləməsi məsələsi gündəmin əsas mövzularından biri olaraq qalır. Son açıqlamalara görə, Azərbaycan sülh sazişinin imzalanması üçün Ermənistanın konstitusiyasında müəyyən dəyişikliklərin həyata keçirilməsini və ərazi iddialarının tamamilə aradan qaldırılmasını gözləyir. Eyni zamanda, Vaşinqtonda imzalanan Birgə Bəyannamədə Azərbaycanın ayrılmaz hissəsi olan Naxçıvanla maneəsiz əlaqəsinin təmin olunması, eləcə də regionda iqtisadi inteqrasiyanın və nəqliyyat imkanlarının genişləndirilməsi xüsusi olaraq vurğulanıb. Bu, tərəflər arasında münasibətlərin normallaşdırılması istiqamətində atılan mühüm addımlardan biridir.
Mövzu ilə bağlı Crossmedia.az-a açıqlama verən Milli Məclisin deputatı Azər Badamov bildirib ki, sülh müqaviləsinin Vaşinqtonda paraflanmasından sonra Ermənistan baş naziri Nikol Paşinyan Ermənistanın konstitusiyasında müvafiq dəyişikliyin edəcəyinə söz verib: "Düzdür, Ermənistanda siyasi mühit o qədər ürək açan olmasa da Paşinyanın qarşıdan gələn seçkilərdə qalib olacağı və hakimiyyətdə qalacağını hesab edirəm. Hətta Ermənistanda hakimiyyətə kimin gələcəyindən asılı olmayaq, imzalanan sənəd şəxslər arasında yox, dövlətlər arasında imzalanıb. Bu baxımdan Azərbaycan və Ermənistan arasında sülhün dayanıqlı olmasına dövlətlər öhdəlik götürüb. Həmçinin Ermənistan dövləti konstitusiyasında dəyiklik edilməsi ilə bağlı öhdəlik götürüb".
Deputat bildirib ki, əgər Ermənistan dövləti əldə olunmuş sülh gündəliyindən yayınmaq istəsə, bu ilk növbədə ABŞ-yə hörmətsizlik kimi başa düşüləcək və bu, Ermənistan-ABŞ münasibətlərinə çox ciddi təsir göstərəcək: "Həm də sülh müqaviləsinin paraflanmasını dünya birliyi tərəfindən dəstəklənir və münasibətini bildirib. Əgər Ermənistan geri addım atmağı düşünərsə, bu, həm də dünya birliyinə hörmətsizlik olacaq. Paşinyanın son açıqlamalarının Ermənistanın daxili auditoriyasını konstitusiyasında müvafiq dəyişikliklərin edilməsinə hazırlıq məqsədi daşıdığını düşünürəm. Bütün bunları nəzərə alaraq deyə bilərik ki, yaxın gələcəkdə Ermənistan konstitusiyasında müvafiq dəyişikliyin edilməsi real görünür".
Mehriban Yariyeva
16:37 27.08.2025
Oxunuş sayı: 2428
