"Mazandaran pələngi" - İmaməli Həbibi vəfat etdi
Dünya güləş məktəbinin ən parlaq ulduzlarından biri söndü... O həm də dövrünün ən sevimli kino ulduzu idi. Azərbaycan cəmiyyəti onu keçən əsrin 60-cı illərin ortalarından C.Cabbarlı adına “Azərbaycanfilm” Kinostudiyasının dublyaj etdiyi “Mazandaran pələngi” bədii-avtobioqrafik filmindən də yaxşı tanıyırdı. Bu film dünya çempionu İmaməli Həbibinin kəşməkəşli həyatından, mübarizələrlə zəngin ömür yolundan, mərdliyindən, dürüstlüyündən, böyük sevgisindən bəhs edirdi. Kinoda Həbib rolunu Şahmar Ələkbərov, Kor Lalə obrazını Amalya Pənahova, Sitarə surətini Ofeliya Sənani səsləndirmişdir. Qələbə uğrunda mübarizədə rəqiblərin peşəkarlıqla yanaşı mənəvi-əxlaqi dəyərlərə üstünlük verməsi, insani keyfiyyətlərin önəm daşıması tamaşaçıları riqqətə gətirmiş, gəncləri kütləvi idman yarışlarına ruhlandırmışdır.
“Mazandaran pələngi” ləqəbi ilə məşhurlaşmış İmaməli Həbibi 1931-ci il 27 may tarixində Mazandaranın Babil bölgəsi, Qaimşəhrdə anadan olmuş, gənclik illərində sərbəst güləş üzrə mükəmməl təlim almışdır. İran üzrə beş dəfə ölkə çempionu olmuşdur. 1956-cı ildə Avstraliyanın Melburn şəhərində keçirilən Yay Olimpia Oyunlarının 67 kq çəki dərəcəsi üzrə qızıl medalına layiq görülmüşdür. O Tokioda (1958), Tehranda (1959), İokohamada (1961) və Toledoda (1962) keçirilən sərbəst güləş üzrə yarışlarda Dünya kubokunun qalibi olmuş, qızıl medallara layiq görülmüşdür.
İmaməli Həbibi Azərbaycanı sevirdi, şair Hacı Soltan Əlizadə ilə sıx əlaqələr saxlayırdı. H.S.Əlizadə böyük idmançıya həsr etdiyi və 2012-ci ildə “Ozan” nəşriyyatında çap olunan “Mazandaran pələngi İmaməli Həbibi” adlı kitabını əsərinin qəhrəmanına göndərmiş, onunla dəfələrlə Mazandaranda görüşmüşlər. H.S.Əlizadənin bu kitabı haqqında İran mətbuatında müsbət rəylər dərc edilmişdir.
İ.Həbibinin ən böyük arzularından biri Azərbaycanı ziyarət etmək, pərəstişkarları ilə səmimi ünsiyyətdə olmaq idi. Necə deyərlər qismət olmadı. Mazandaran pələngi İmaməli Həbibi uzun sürən ağır xəstəlikdən sonra, bazar günü, 24 iyunda vəfat etmiş, bu gün Mazandaranın Sari şəhərində dəfni nəzərdə tutulmuşdur. Ruhu şad olsun.
Dostlardan bir qrup.
15:46 27.08.2025
Oxunuş sayı: 7184
