30 ildən sonra cinayətin üstü açıldı — Baş Prokurorluq əhaliyə müraciət edib
Ötən illərdən bağlı qalan qəsdən adam öldürmə cinayətlərinin açılması istiqamətində prokurorluq və daxili işlər orqanlarının səmərəli fəaliyyəti davam etdirilir.
Bu barədə Crossmedia.az-a Baş Prokurorluqdan məlumat verilib.
Bakı şəhərinin Suraxanı rayon prokurorluğu və rayon polis idarəsinin əməkdaşları tərəfindən peşəkarlıqla həyata keçirilən birgə istintaq və əməliyyat-axtarış tədbirləri nəticəsində 1995-ci ilin may ayında paytaxtın hava limanından taksi fəaliyyəti ilə məşğul olan şəxslər tərəfindən müştəri qismində götürülmüş kişi cinsli şəxsin quldurluqla əlaqədar kəsiçi-deşici alətlə Suraxanı rayonu, Yeni Suraxanı qəsəbəsində qəsdən öldürülməsi cinayətinin üstü açılıb. Təqsirləndirilən şəxslərin məsuliyyətə cəlb olunması təmin edilib. Hazırda iş üzrə zərərçəkmişin şəxsiyyətinin müəyyənləşdirilməsi zərurəti yaranıb.
Bununla əlaqədar, Azərbaycan Respublikasının Baş Prokurorluğu zərərçəkmişin şəxsiyyətinin müəyyən edilməsinə dəstək göstərməsi üçün əhaliyə müraciət edir: “Zərərçəkmiş 1955–1970-ci illərdə doğulub. Boyu təxminən 175 sm-dir. Sol dirsəyin ön səthində çapıq var. Sol saidin yuxarı və orta 1/3 hissəsinin ön səthində 11 ədəd köhnə çapıq izi mövcuddur. 1995-ci ilin aprel–mayında MDB ölkələrindən, əsasən Rusiyadan hava yolu ilə Azərbaycana qayıdıb. O vaxtdan itkindir. MDB ölkələrində, o cümlədən Rusiyada yaşamış və ya işləmiş ola bilər. Bu xüsusiyyətlərə uyğun olan və ya belə bir şəxs barədə məlumatı olan şəxslərdən xahiş olunur ki, Bakı şəhər prokurorluğu və ya Suraxanı rayon prokurorluğuna (+994 12) 361 04 06, (+994 12) 361 04 09, (+994 12) 361 02 51, “961 Çağrı Mərkəzi” vasitəsilə müraciət etsinlər. Baş Prokurorluq ictimaiyyətə öncədən göstərdiyi diqqət, dəstək və əməkdaşlığa görə dərin təşəkkürünü bildirir. Hər bir vətəndaşın verdiyi məlumatın istintaq prosesinə böyük töhfə verdiyini vurğulayır və aidiyyəti şəxsləri məlumat verməyə çağırır”.
Nəzrin Salmanova
11:08 27.08.2025
Oxunuş sayı: 804
