Oğlu tələbə adını qazanan parlamentari: "Ona ən yaxşı nümunə elə özüm olmağa çalışmışam"
Avqustun 22-də ali məktəbə qəbul nəticələri açıqlanıb. Beləliklə, hər il olduğu kimi, yenə yüzlərlə gənc tələbə adını qazandı. Onların həyatında yeni mərhələ başlandı. Övladlarının uğurlarına sevinən valideynlər arasında tanınan simalar, ictimai- siyasi şəxslər də var. Onlardan biri də Milli Məclisin deputatı Elnarə Akimova da var. Parlamentari öz sevincini Crossmedia.az-a bölüşüb. Onunla müsahibəni təqdim edirik:
- Elnarə xanım, oğlunuz hansı universitetə, hansı ixtisasa qəbul oldu. Bu onun öz istəyi idimi?
- Oğlum Bakı Dövlət Universitetinin
Geologiya fakültəsinə daxil oldu. Dövlət Sifarişi əsasında oxuyacaq. Öz istəyi
idi, bəli. Həm universitet seçimi, həm də düşdüyü ixtisas ürəyincə oldu.
- Bir alim və tədqiqatçı kimi övladınıza
dərslərində necə kömək edirdiniz?
- Mən sadəcə diqqətdə saxlayırdım, nəzarət
edirdim. Müəllimləri ilə əlaqə saxlayırdım. İşlərim həddindən artıq çox olsa
belə, övladlarımın təhsili, tərbiyəsi mənim üçün əhəmiyyətli məsələ olub həmişə.
Çox şükür ki, hər ikisi tərbiyələri ilə seçilirlər. Daha çox bununla
qürurlanıram. İnanıram ki, öz sahələrində də sözlərini deyəcək şəxslər kimi
yetişəcəklər. Böyük oğlum Azərbaycan
Tibb Universitetinin Müalicə işi ixtisasında, üçüncü kursda təhsil alır. Çox
güclü nəzəri savada, yaddaşa sahibdir. Prezident təqaüdçüsüdür. İkinci oğlumun
marağı başqa sahəyə oldu.
- Övladınızı necə motivasiya edirdiniz?
- Düzünü deyim, oğlumun motivasiyaya ehtiyacı yox idi. Əksinə, qəribə şəkildə rahatlığı, özgüvəni var. Ondakı özünə əminlik hissinə mən belə qibtə edirəm. Mən sadəcə, oxumağın, təhsilli olmağın insan həyatı üçün faydasından daim bəhs etmişəm, nümunələr gətirmişəm. Amma ən yaxşı nümunə elə özüm olmağa çalışmışam. Çox illər bundan öncə, bir rus müəllifin kitabında belə bir cümlə oxumuşdum ki, övladını necə görmək istəyirsənsə, özün elə ol. Bu fikir daim mənim yaddaşımdadır və övladlarıma yanaşma prioritetimdir.
- Övladlarınızın gələcəkdə ədəbiyyat sahəsində
olmasa belə, hansısa digər bir sahədə sizin kimi alim olaraq yolunuzu davam
etdirmələrini istəyirsinizmi?
-Əslində, ədəbiyyat sevgisi, mütaliəyə maraq ixtisasından asılı olmayaraq, hər kəsə lazımdır. İnsan daim özünü yetişdirməlidir və bu, ancaq kitabların, əsas da bədii ədəbiyyatın sayəsində mümkündür. Zəlimxan Yaqubun misrası var, “Bir əli torpaqda, bir əli haqda”. Bu misranı bir balaca dəyişib desək, insanın bir əli mütləq kitabda olmalıdır. Bu fikri yorulmadan, daim övladlarıma təlqin edirəm ki, universitet biliyi ilə məhdudlaşmasınlar, daim axtarışda, inkişafda olsunlar. Qaldı ki, alim kimi yolumun davam etdirilməsinə, bu bir az fərqli məqamdır. Böyük oğlumun həkim peşəsi ilə yanaşı, həm də alim kimi tibb sahəsinə dair tədqiqatlar aparacağına inanıram. İkinci oğluma dair proqnoz verməkdə çətinlik çəkirəm. O, bir az başqa xarakterli uşaqdır. Daha sərbəst, daha qəfil qərarlara sahibdir. Belə işlər bir az da bacarıq və istedada aid məsələlərdir, tək istək bəs eləmir. İstedad və bacarıq varsa, elmin çətin yoluna qədəm qoymağa dəyər. Yoxsa hansısa daha layiqli birinin qarşısını kəsməyə, yerini tutmağa dəyməz.
12:18 25.08.2025
Oxunuş sayı: 8628
