Azərbaycan “Mərkəzi Asiya + Cənubi Qafqaz”ı vahid formatda təqdim edir -AÇIQLAMA
Azərbaycan ilə Türkmənistan arasındakı əlaqələr əsrlərin sınağından keçmiş dostluq və qardaşlıq üzərində qurulub. Ortaq tarix, dil, mədəniyyət və mənəvi dəyərlər bu iki xalqı bir-birinə bağlayan möhkəm körpü rolunu oynayır. Bu gün isə həmin bağlar yeni strateji əməkdaşlıq formatları, regional təşəbbüslər və qarşılıqlı dəstək layihələri ilə daha da güclənir. Yüksək səviyyəli görüşlər və birgə qərarlar həm ikitərəfli münasibətləri, həm də türk dünyasında birliyi möhkəmləndirərək gələcək üçün yeni imkanlar açır.
Mövzu ilə bağlı Crossmedia.az-a açıqlama verən Milli Məclisin deputatı Pərvanə Vəliyeva bildirib ki, 2025- ci il avqustun 22-də Prezident İlham Əliyev Türkmənistanın Türkmənbaşı şəhərinə işgüzar səfər edib:
“Səfər Türkmənistan Xalq Məsləhətinin sədri Qurbanqulu Berdimuhəmedovun dəvəti ilə həyata keçirilib. Azərbaycan və Türkmən xalqları əsrlər boyu ortaq tarixi köklərə, zəngin mədəniyyətə, oxşar adət-ənənələrə, dil və mənəvi dəyərlərə sahib olmuş xalqlardır. Azərbaycan və Türkmən xalqları arasındakı dərin tarixi bağlar təkcə dil və mədəni yaxınlıqla məhdudlaşmır, həm də qardaşlıq münasibətləri, qarşılıqlı hörmət və dostluq ənənələri ilə möhkəmlənir. Qədimdən Xəzər dənizinin iki sahilində yaşayan bu xalqlar eyni mədəni mühitin daşıyıcıları olub. Ortaq türk kimliyi həm milli yaddaşda, həm də gələcək hədəflərdə xüsusi yer tutur. Bu gün Azərbaycan–Türkmənistan münasibətlərinin strateji tərəfdaşlıq səviyyəsinə yüksəlməsi xalqlarımızın qardaşlıq bağlarının təbii nəticəsi, ortaq tariximizin yeni mərhələdə davamıdır. Səfər çərçivəsində Türkmənistan, Azərbaycan və Özbəkistan liderlərinin iştirakı ilə üçtərəfli yüksək səviyyəli görüş keçirilib. Prezident İlham Əliyev türk dünyasında mövcud mədəni və siyasi yaxınlığı xüsusi vurğulayıb, görüşü “tarixi əməkdaşlığın yeni mərhələsi” kimi dəyərləndirib. Üçtərəfli formatda əməkdaşlıq Mərkəzi Asiya üçün yeni səhifədir. Azərbaycan qazandığı böyük beynəlxalq nüfuz və regionda yaratdığı yeni reallıqlarla artıq “Mərkəzi Asiya + Cənubi Qafqaz” formatlarının vahid şəkildə təqdim olunması kimi xarakterizə olunur. Azərbaycan ilə Türkmənistan arasında qardaşlıq və mədəni yaxınlığın yeni dövrü başlayır. Füzuli və Arxadağ şəhərləri arasında qurulan qardaşlıq əlaqələri, habelə Türkmənistanın Füzulidə məscid inşa etmək təşəbbüsü bunun bariz nümunəsidir. Məscidin azad olunmuş ərazilərimizdə inşası isə qardaş ölkənin yenidənqurma işlərinə dəstəyini ifadə edir. İkitərəfli əməkdaşlığın əsas istiqaməti nəqliyyat sektorudur. Hər üç ölkə “Böyük İpək Yolu”nun bərpası üçün Avropanı Asiya ilə birləşdirən nəqliyyat dəhlizləri çərçivəsində əlaqələri genişləndirmək barədə razılığa gəliblər. Xüsusən, Mərkəzi Asiyanın və Xəzər hövzəsinin nəqliyyat infrastrukturunun gücləndirilməsi imkanları nəzərdən keçirilib. Prezident İlham Əliyev bu istiqamətdə Türkmənistan və Özbəkistanla əməkdaşlığa xüsusi önəm verdiyini qeyd edib. Görüş zamanı enerji sahəsi üzrə də ciddi müzakirələr aparılıb, SOCAR-ın Türkmənistanın qaz və neft sektorunda əməkdaşlıq perspektivləri nəzərdən keçirilib.
Azərbaycan–Türkmənistan dostluğu gələcəkdə daha da möhkəmlənəcək, qardaşlıq münasibətləri yeni nailiyyətlərə yol açacaqdır”.
Nəzrin Salmanova
11:05 25.08.2025
Oxunuş sayı: 1500
