Türkmənistanın zirvə görüşündə iştirakı bütövləşmənin simvoluna çevriləcək — AÇIQLAMA
2025-ci ilin 6–7 oktyabr tarixlərində Qəbələ şəhəri Türk dünyası üçün tarixi əhəmiyyət daşıyan bir görüşə ev sahibliyi edəcək. İlk dəfə olaraq Türkmənistan Prezidenti Sərdar Berdiməhəmmədov və Türkmənistan Xalq Məsləhətinin sədri Qurbanqulu Berdiməhəmmədov bu görüşə rəsmi şəkildə dəvət olunub. Bu dəvət Türkmənistanın uzun illər qoruduğu bitərəf mövqeyindən çıxaraq türk dövlətləri ilə daha sıx və strateji əməkdaşlığa doğru addım atmasının rəmzi kimi dəyərləndirilir.
Mövzu ilə bağlı Crossmedia.az-a açıqlama verən Türk Dünyası üzrə mütəxəssis İlqar İlkin bildirib ki, bu ilin oktyabrın 6-7-də Qəbələdə Türk dövlət başçılarının zirvə görüşünə ilk dəfə olaraq Türkmənistan Prezidenti Sərdar Berdiməhəmmədov və eyni zamanda Türkmənistan Xalq Məsləhət Şurasının sədri Qurbanqulu Berdiməhəmmədov Azərbaycan Prezidenti tərəfindən dəvət olunub:
“Bu vaxta qədər keçirilən zirvə görüşləri arasında, xüsusilə türk dövlət başçılarının və türk dövlət xalqlarının bütöv şəkildə təmsil olunması baxımından bu, çox ciddi bir addım olacaq. Çünki bu vaxta qədər nə türk dövlət başçılarının zirvə görüşlərində, nə də qeyri-rəsmi zirvə görüşlərinin heç birində Türkmənistan Konstitusiyasına əsas gətirərək — ki, orada hər zaman Türkmənistan yalnız bitərəf qalır, heç bir koalisiyalara qoşulmur — bu məsələni açmış olduq. Hesab edirəm ki, bir neçə ay əvvəl Qurbanqulu Berdiməhəmmədovun Azərbaycana səfəri, eləcə də bu günlərdə Azərbaycan Prezidenti İlham Əliyevin Türkmənistana səfəri, qardaş türk xalqlarının Azərbaycan və Türkmənistan üzərindən birləşdirilməsi baxımından olduqca vacib bir addım idi. Ayrıca, istər Azərbaycan Prezidentinin Qurbanqulu Berdiməhəmmədova, istərsə də onların Azərbaycan Prezidentinə bağışladığı — türkün simvolu olan — at burada xüsusi önəm daşıyır. Türk xalqlarında at həm murad, həm də müqəddəs bir rəmzdir. Əgər bir türk xalqı, türk lideri öz atını bağışlayırsa, bu, bütün müqavilələrdən və sözləşmələrdən üstün sayılır. Türkmənistan növbəti zirvə görüşündə iştirak etməklə bu mərhələdə ola bilsin ki, müşahidəçi, daha sonra isə həqiqi üzv ola bilər. Bu zaman bizim istədiyimiz Turan və türk dövlətləri, türk xalqlarının bütövlüyü təmin olunmuş olacaq. Bundan sonrakı mərhələdə Türkmənistanın bu prosesə qatılması Türk Dövlətləri Təşkilatlarını iqtisadi baxımdan da gücləndirəcək və beynəlxalq layihələrdə, xüsusən neft-qaz layihələrində ciddi üstünlüklər əldə olunacaq. Türkmənistanın zirvə görüşündə iştirakını çox yüksək qiymətləndirirəm və hesab edirəm ki, bu, bütün türk xalqları üçün növbəti bütövləşmənin bir simvoluna çevriləcək”.
Nəzrin Salmanova
15:10 23.08.2025
Oxunuş sayı: 5302
