“Münasibətlərimizi tarixi mənzərəsinə qaytarmaq üçün yeni imkanlar yaranıb" - Deputat
Prezident İlham Əliyevin Türkmənistana səfəri Azərbaycan–Türkmənistan əlaqələrinin yeni mərhələsinə yol açmaqla yanaşı, bütövlükdə Türk dövlətləri arasında strateji həmrəyliyin güclənməsində tarixi dönüş nöqtəsi kimi qiymətləndirilir.
Bu barədə Crossmedia.az-a şərh edən Milli Məclisin deputatı Hikmət Babaoğlu bildirib ki, Azərbaycan Prezidentinin qardaş Türkmənistana səfəri həm ikitərəfli, həm də Özbəkistan–Azərbaycan–Türkmənistan üçtərəfli münasibətləri baxımından tarixi və strateji əhəmiyyət daşıyır:“Uzun illərdir ortaq coğrafiyamızın resursları milli iradəmizdən kənar istismar edilib, milli maraqlarımızın lehinə istifadəsinə isə əngəllər yaradılıb. Son 200 illik tariximizə nəzər salsaq, bunu aydın görərik. Bu gün isə münasibətlərimizi öz tarixi məcrasına qaytarmaq üçün yeni imkanlar yaranıb”.
Deputat qeyd edib ki, Türk dövlətlərinin prezidentləri parlaq liderlik keyfiyyətləri ilə xalqlarımız üçün yeni reallıqlar formalaşdırırlar: “Azərbaycan Prezidentinin yaratdığı yeni imkanlar xalqımız üçün tarixi şansdır. Eyni ilə Özbəkistan Prezidenti Şavkat Mirziyoyevin qardaşlıq münasibətlərinə verdiyi töhfə də Özbək xalqı üçün böyük imkanlar açır. Tarixi coğrafiyamız böyük resurslara və mühüm geostrateji mövqeyə malikdir”.
Hikmət Babaoğlu bildirib ki, imzalanan sənədlərdə iqtisadi əməkdaşlığın bütün istiqamətləri əhatə olunub. Xüsusilə Xəzər ətrafı logistikanın genişləndirilməsi, nəqliyyat kommunikasiyalarının qurulması və resursların dünya bazarına çıxarılması məsələləri prioritetdir.
Deputat eyni zamanda görüşün mənəvi və humanitar aspektlərinə də diqqət çəkib: “Prezidentlərin qarşılıqlı şəkildə bir-birlərinə at hədiyyə etməsi türkün qanadı və ruhu olan atın dostluq və qardaşlıq rəmzinə çevrilməsi baxımından mühüm hadisədir. Həmçinin Türkmən atları ilə Qarabağ atlarının beynəlxalq yarışlarda birgə iştirakı qərara alındı. Bu, həm də qardaşlıq əlaqələrinin humanitar-mənəvi tərəfini gücləndirəcək”.
Mehriban Yariyeva
14:44 23.08.2025
Oxunuş sayı: 5468
