İlham Əliyevin Türkmənistan səfəri Azərbaycanın türk dünyasının birliyinə yanaşmasının göstəricisidir - Politoloq
Məlum olduğu kimi, ötən gün Azərbaycan Respublikasının Prezidenti İlham Əliyev Türkmənistan Xalq Məsləhətinin sədri Qurbanqulu Berdiməhəmmədovun dəvəti ilə Türkmənistanda işgüzar səfərdə olub. Səfər çərçivəsində Türkmənbaşı şəhərində geniş tərkibli görüş keçirilib. Görüş zamanı Azərbaycan ilə Türkmənistan arasında enerji, nəqliyyat-logistika, ticarət, mədəni və humanitar sahələrdə əməkdaşlığın inkişaf perspektivləri müzakirə olunub.
Prezident İlham Əliyev görüşdən sonra bildirib: “Bu gün Azərbaycan və Türkmənistan müstəqil dövlətlər olaraq bu ənənələrə sadiq qalır və yeni üfüqlərə doğru birgə addımlar atırlar.”
Ölkə başçısının bu cür səfəri və isti münasibəti bir daha ölkəmizin və Ali Baş Komandanımızın Türk dövlətlərinə və onların birliyinə böyük hörmət və əhəmiyyətlə yanaşmasının bariz sübutudur.
Ölkə başçısının səfəri ilə bağlı Crossmedia.az-a açıqlama verən politoloq Arzuman Abdulkərimov iki ölkə arasında əlaqələrin əhəmiyyətli dərəcədə inkişaf etdiyini qeyd edib.
“Ölkə başçısının Türkmənistana səfəri bir daha rəsmi Bakının Türk dövlətlərinə diqqət göstərdiyinin sübutu oldu. Unutmaq olmaz ki, ötən ay Türkmənistan Xalq Məsləhətinin sədri Qurbanqulu Berdiməhəmmədovun ölkəmizə səfəri də iki ölkə arasında əməkdaşlığın yeni mərhələsinin başlandığını göstərmiş oldu. Hələ Ulu Öndər Heydər Əliyevin dövründən Türkmənistan ilə müxtəlif əməkdaşlıqlar mövcud olub. Bu gün isə bu münasibətlər daha da genişlənmişdir. Ölkə başçısının Avaza şəhərində çıxışı zamanı burada ikinci dəfə səfərdə olduğunu, buradakı inkişafı yüksək qiymətləndirdiyini bildirməsi bir daha rəsmi Bakının Türkmənistana və onun ağsaqqalı Qurbanqulu Berdiməhəmmədova olan diqqətinin göstəricisidir. Əlbəttə ki, dünən Türkmənistanda mühüm sənədlər imzalandı. Onlar arasında ən maraqlı və əlaqələri gücləndirən sənəd məhz Arxadağ və Füzuli şəhərlərinin qardaşlaşma sənədidir. Bu, əslində, bizim Türkmənistanla qardaşlığımızın rəmzidir. Ölkə başçısının da qeyd etdiyi kimi, türkmən və Azərbaycan xalqları əsrlər boyu bir ailə kimi, qardaşlar kimi yaşayıb-yaratmışlar. Bu gün iki müstəqil dövlət bu ənənələrə sadiq qalaraq onları qoruyur və inkişaf etdirir. Buradan belə qənaətə gəlmək olar ki, Türkmənistanla bizim mövqelərimiz üst-üstə düşür. Türkmənistanın və onun rəhbərliyinin bu diqqəti Azərbaycana və onun liderinə olan hörmətdən qaynaqlanır.
Qeyd edim ki, Qurbanqulu Məlikquliyeviç ötən ay Qarabağda olarkən Türkmənistan tərəfindən qardaş ölkəyə hədiyyə olaraq məscidin tikintisi ilə bağlı təklif irəli sürmüşdü. Cəmi bir ay keçməsinə baxmayaraq, artıq məscidin memarlıq layihəsi hazırdır və yaxın gələcəkdə təməli qoyulacaq. Bu, türkmən xalqının və Türkmənistan liderinin Azərbaycan xalqına, dövlətinə olan dəstəyinin nümunəsidir və qardaşlığımızın təcəssümüdür.”
Politoloq həmçinin bu əlaqələrdə Özbəkistanın da fəal iştirak etdiyini vurğulayıb.
“Qeyd edim ki, Özbəkistanın inşa etdiyi tikiş fabriki Xankəndində artıq fəaliyyət göstərir. Bu yaxınlarda Özbəkistan lideri Şavkat Miromonoviçi də eyni qardaşlıq hissləri ilə qəbul etdik. İki ölkə lideri Xankəndidə ECO Zirvə görüşündə birlikdə iştirak etdi. Ölkə başçıları Xankəndidə olarkən Şavkat Miromonoviçin təşəbbüsü ilə yaradılmış böyük tikiş fabrikinin fəaliyyəti ilə tanış oldular. Bildirmək istəyirəm ki, hazırda orada iki yüzdən çox insan çalışır. Onların mütləq əksəriyyəti qadınlardır və fabrikin genişləndirilməsi nəticəsində orada işləyənlərin sayı bir neçə dəfə artacaq. Bu, əlbəttə ki, Azərbaycana, dirçələn Qarabağ bölgəsinə qardaş özbək xalqından çox böyük bir hədiyyədir. Birinci hədiyyə isə Qarabağın dirçəldilməsi istiqamətində atılmış addımlar arasında yenə Şavkat Miromonoviçin təşəbbüsü ilə Füzulidə dahi özbək mütəfəkkiri Mirzə Uluqbəyin adını daşıyan 960 şagird yerlik orta məktəbin timsalında olmuşdur. Hazırda həmin məktəbdə yüzlərlə şagird təhsil alır və elmə yiyələnir.
Biz Özbəkistanla sözdə deyil, əməldə dost və qardaşıq. Ölkə başçısının da qeyd etdiyi kimi, bizim üçün ən vacib və çətin məsələlərdə həmişə qardaşlarımız yanımızda olub. Bu gün də belədir. Üçtərəfli əməkdaşlığın daha da inkişaf etdirilməsi əlbəttə hər üç ölkəyə böyük üstünlüklər qazandıracaq. Bu, bir daha dünya ölkələrinə əsl qardaşlıq və dostluq nümunəsidir və gələcəkdə daha da möhkəmlənəcək,” – deyə politoloq qeyd edib.
Elmir Heydərli
12:37 23.08.2025
Oxunuş sayı: 1031
