ABŞ-dən Ukraynaya "qırmızı işıq": Nə Krım var, nə NATO
ABŞ Prezidenti Donald Tramp deyib ki,“Fox News”a müsahibəsində deyib ki, Krımın Ukraynaya qaytarılması və Ukraynanın NATO-ya üzv olması mümkün deyil.
Bununla belə, Tramp Ukraynaya hansısa formada təhlükəsizlik təminatı veriləcəyini bildirib. O, ABŞ-ın bu məsələyə kömək göstərməyə hazır olduğunu vurğulayıb.
Halbuki müharibə məhz Krımın azad olunması və rəsmi Kiyevin Alyansa üzvlük iddiasına görə başlamışdı. İndi Vaşinqton bunları rədd edirsə, savaşa başlamağın mənası var idimi?
ABŞ-ın Ukraynaya təminatları: Emil Həsənlinin şərhi
ABŞ Prezidenti Donald Tramp “Fox News”a müsahibəsində bildirib ki, Krımın Ukraynaya qaytarılması və ölkənin NATO-ya üzv olması mümkün deyil, lakin ABŞ Ukraynaya müəyyən təhlükəsizlik təminatları verməyə hazırdır.
Bu barədə Crossmedia.az-a danışan hərbi ekspert Emil Həsənli bildirib ki, Ukraynanın müstəqilliyinin ilk illərində ABŞ, Britaniya və Rusiya nüvə silahını onun əlindən aldı: "Rusiya da daxil olmaqla hər üç dövlət təminat verdi ki, Ukraynanın ərazi bütövlüyünə, suverenliyinə və müstəqilliyinə qarşı hansısa qəsd olsa, bu üç dövlət Ukraynanı müdafiə edəcək.
Əvəzinə nə baş verdi? Rusiya Krımı işğal etdi, daha sonra isə Ukraynanın digər ərazilərini işğal etdi. 2014-cü ildə bu təminatlar qüvvədə idi, lakin buna baxmayaraq Krım işğal olundu. Sonrakı dövrdə Ukraynanın qalan ərazilərinin müdafiəsi də təmin olunmadı və bu təminatlar heç bir fayda vermədi”.
Onun sözlərinə görə, ABŞ-nin keçmiş prezidenti Cozef Bayden dəfələrlə Ukraynanın NATO üzvü olmasına birbaşa dəstək verib: "Ondan əvvəlki liderlər də Ukraynanın, eləcə də Gürcüstanın NATO üzvlüyü üçün Avropa inteqrasiyası istiqamətində hər cür maddi və təhlükəsizlik dəstəyi göstərəcəklərini bildiriblər. Amma nəticədə Ukrayna parçalandı, torpaqları işğal olundu. Ukrayna müharibəsinin nəticəsi şəhərlərin dağıdılması, on milyonlarla ukraynalının ölkəni tərk etməsi, iqtisadiyyata milyardlarla zərər dəyməsi, yüz minlərlə insanın həlak olması və ya yaralanması ilə müşayiət olundu. Təminatlar isə real nəticə vermədi. ABŞ və digər Qərb dövlətlərində hakimiyyət dəyişdikcə verilən təminatlar da dəyişir. Baydenin verdiyi təminatları Tramp qəbul etmir, zamanında Corc Buşun, Bill Klintonun verdiyi təminatları Barak Obama qəbul etməmişdi, Tramp Obamanın təminatını, Bayden isə Trampın verdiyini qəbul etmədi. Yəni prezidentlər bir-birini əvəz edəndə bu cür yanaşmaların şahidi olmuşuq. Ona görə də dövlətlər bunu nəzərə almalıdır”.
“Beynəlxalq hüquq və verilən bu vədlər əslində söz üzərindədir, müqavilələr isə kağız parçasından başqa bir şey deyil. Biz bunu öz torpaqlarımız işğal olunanda da görmüşük. Beynəlxalq ictimaiyyətin dəstəyi çox zaman formal xarakter daşıyır. Ona görə də Ukrayna məsələsində indiyədək heç olmasa bütün bunlar nəzərə alınmalıdır”, – deyə E. Həsənli qeyd edib.
Mehriban Yariyeva
12:28 21.08.2025
Oxunuş sayı: 1324
