Tramp və Putinin razılaşmaları pozula bilər -AÇIQLAMA
İllərdir davam edən Rusiya-Ukrayna müharibəsi sülhə yaxınlaşıb. ABŞ prezidenti Donald Trampın sülh üçün göstərdiyi səylər və Alyaska görüşü beynəlxalq ictimaiyyətdə sülhə inam yaradıb. Düzdür tərəflər müəyyən şərtlərdə hələ də razılığa gəlməyiblər. Belə ki, Ukraynanın suverenliyini bərpa etmək istəyi, Rusiyanın da işğal etdiyi ərazilərdə qalma çabası tərəfləri sülhdən uzaqlaşdırır. Alyaska görüşündən sonra Tramp və Putin arasında müəyyən razılaşmalar əldə olunsa da Ukrayna prezidenti Volodimir Zelenski ilə görüşdən müsbət nəticələr gözlənilmir.
Mövzu ilə bağlı politoloq Elçin Xalidbəyli Crossmedia.az-a açıqlama verib: “Alyaska görüşündə ABŞ prezidenti Donald Tramp və rusiyalı həmkarı Vladimir Putin arasında müəyyən razılaşmaların əldə olunduğu barədə məlumatlar mövcuddur. Tramp həm Ukrayna prezidenti Volodimir Zelenski həm də digər Avropa liderləri ilə danışıqlar apararaq razılaşmaların yerinə yetirilməsinə çalışır. Ona görə də ABŞ ilə Ukrayna arasındakı münasibətlərin yenidən gərginləşmə ehtimalı kifayət qədər yüksəkdir. Çünki Ukrayna prezidenti Vaşinqtona səfərə getməzdən əvvəl bəyan edib ki, Ukrayna konstitusiyasına zidd qərara imza atmayacaq. Həmçinin heç bir ərazi mübadiləsinə və ərazi güzəştinə getməyəcək. Bu baxımdan böyük ehtimalla Tramp növbəti dəfə Zelenskiyə təzyiq göstərməyə çalışacaq. Nəticədə Ukrayna ilə ABŞ arasında müəyyən gərginlik yarana bilər. Eyni zamanda Avropa birliyi ölkələri də Rusiyanın şərtləri daxilində sülh sazişinin imzalanmasına qarşı çıxırlar. Bu da o deməkdir ki, Avropa Birliyi ölkələri Vaşiqnton görüşündə Zelenskini dəstəkləyəcək. Bu da gərgin müzakirələr vəd edir. Tramp üçün də olduqca çətin bir situasiya yaranacaq”.
Politoloq Uitkofun açıqlamasını absurd adlandırıb: “Trampın xüsusi nümayəndəsi Uitkofun 5 ərazinin güzəştə gedilməsi ilə bağlı dedikləri isə absurd səslənir. Rusiya hansı əraziləri güzəştə getmək niyyətindədir? Ukraynanın işğal edilən ərazilərini? Rusiya hazırda Ukrayna ərazilərini işğal edir. İşğal etdiyi əraziləri Ukraynaya güzəştə getmək istəyirsə bu absurd və məntiqsiz bir məsələdir. Çünki müharibənin ədalətli həlli Ukraynanın işğal olunmuş ərazilərini güzəştə getmək deyil, Rusiyanın işğal etdiyi bütün ərazilərdən çıxaraq öz sərhədlərinə çəkilməsidir. Yalnız bu halda ədalətli sülh ola bilər. Böyük ehtimalla Rusiyanın bu təklifi Ukrayna tərəfindən qəbul edilməyəcək”.
Poltoloq həmçinin bildirib: “Ukrayna öz ərazilərini Rusiya ilə mübadilə etmək niyyətində deyil. Və ümumiyyətlə hansısa ərazilər qaytarılsa belə qaytarılmamış əraziləri Rusiyaya güzəştə getmək kimi niyyəti yoxdur. Bu da onu göstərir ki, Ukrayna savaşında sülh məsələsi o qədər də inandırıcı görünmür. Böyük ehtimalla Vaşinqton görüşü müsbət nəticə verməyəcək. Ukraynanın Rusiyanın şərtlərini qəbul etmək imkanı demək olar ki, çox zəifdir və Vaşiqntonda Zelenski şərtlərlə razılaşmasa savaşın uzanması qaçınılmaz olacaq. Savaş uzandıqca müzakirələr də dalana dirənmiş olacaq. Sonrakı proseslərdə də elə bir situasiya yarana bilər ki, Tramp və Putinin də razılaşmaları pozula bilər”.
Ayhan
17:08 18.08.2025
Oxunuş sayı: 838
