Diplomatiyanın uğursuzluğu: Tramp–Putin danışıqları niyə nəticəsiz qaldı?
Alyaskada keçirilən Tramp–Putin görüşü dünya siyasətində böyük maraq doğursa da, nəticələri gözlənildiyi qədər səs-küylü olmadı. Görüşdən öncə əsas gündəm mövzusu kimi göstərilən atəşkəs məsələsinə yekun açıqlamada ümumiyyətlə toxunulmaması Tramp administrasiyasının hədəfinə nail ola bilmədiyini göstərdi. Bu, bəzi müşahidəçilər tərəfindən ABŞ üçün fiasko, digərləri tərəfindən isə sadəcə gözləntilərin doğrulmaması kimi qiymətləndirilir.
Crossmedia.az xəbər verir ki, Moderator.az-a açıqlamasında Cross Media Təhlil Mərkəzinin analitiki, siyasi şərhçi Mübariz Göyüşlü bildirib ki, Alyaska görüşü gözləntiləri doğrultmadı və faydası olduqca məhdud oldu:
“Bu görüşdən nə Trampın, nə də sülh gözləyənlərin ümidləri reallaşmadı. Xüsusilə Ukrayna üçün heç bir müsbət nəticə əldə edilmədi. Görünən odur ki, tərəflər əsas mövzunu – Ukraynadakı müharibəni demək olar ki, müzakirə etməyiblər. Mətbuat konfransının qısa sürməsi və sualların lazımi şəkildə cavablandırılmaması da bunu təsdiqləyir.
Rusiya isə işğalçı mövqeyindən geri çəkilmədi. Hətta görüşün keçirildiyi gecə belə, Rusiyanın Ukraynaya hücumları davam etdi. Bu da göstərir ki, təcavüzkar Rusiya ilə diplomatik danışıqlar yolu ilə problemi həll etmək, demək olar ki, mümkünsüzdür.
Görüşdə daha çox ticarət məsələlərinin – Atikada birgə layihələr, təbii resurslardan istifadə və digər iqtisadi əməkdaşlıq imkanlarının müzakirə olunduğu görünür. Amma bunlar yeni dünya nizamı və sülh baxımından gözlənilən nəticələr deyildi. Əsas gündəm olan Ukrayna məsələsində isə heç bir irəliləyiş baş vermədi. Təəssüf ki, bu görüşdən müsbət nəticə çıxmadı”.
Mehin Mehmanqızı
14:45 16.08.2025
Oxunuş sayı: 552
