“Alyaskada jurnalistlərin yerləşdirildiyi yer evsiz-eşiksiz adamların sığınacağına bənzəyirdi” - Ekspert
Alyaska görüşündə Rusiya Prezidenti Vladimir Putin Ukraynada mülki şəxslərin öldürülməsi ilə bağlı jurnalistlərin suallarına cavab verməyib. Görüş zamanı jurnalistlər Putinə sərt suallar ünvanlayıb lakin o, suallara lazımi diqqət ayırmayıb və nəticədə proses yarımçıq dayandırılıb.
Putinin jurnalistlərin suallarına məhəl qoymaması onun Alyaska görüşündə haqsız mövqeyini qorumağa çalışdığını göstərir. Jurnalistlərin sərt suallara baxmayaraq reaksiyasız qalması, həmçinin görüşdə gərgin atmosfer yaradıb. Görüşdə media mənsublarının davranışı, onlara olan münasibət və s. bu kimi mövzularla bağlı siyasi şərhçi Azər Həsrət Crossmedia.az-a açıqlama verib.
A.Həsrət, Putinə o cür sərt sualların ünvanlanması və ortada xaosun yaradılmasının ABŞ-nin planlı hərəkəti olduğunu bildirib: “Ümumiyyətlə düşünürəm ki, Putinin qarşılanması, Putinlə bərabər Rusiyadan gəlmiş media təmsilçilərinin də qarşılanması, yerləşdirilməsi ondan xəbər verir ki, ABŞ faktiki olaraq Putinin heyətini – Rusiya heyətini gözdən saldı. Özəlliklə də Rusiyadan gələn jurnalistlərin yerləşdirildiyi yer sadəcə olaraq küçədə qalmış, evsiz, eşiksiz adamların müvəqqəti olaraq cəlb edildiyi sığınacağa bənzəyirdi. Və bəlli olur ki, Alyaskada heç bir hotel Rusiyadan gələn jurnalistlərin yerləşdirilməsi üçün yer ayırmayıb. Ümumiyyətlə, Alyaska rəhbərliyi Rusiyadan qonaqların gəlməsinə isti yanaşmayıb. Bir sözlə, çox hörmətsiz qarşıladılar və çox da hörmətsiz yola saldılar.
Putinə o cür sərt sualların ünvanlanması və ortada xaosun yaradılması da mənə elə gəlir ki, ABŞ-nin planlı hərəkəti idi. Yəni Putini və onun heyətini gözdən salmağa, psixoloji olaraq küncə sıxışdırmağa hesablanmışdı və buna da nail oldular. Hətta danışıqlar bitdikdən sonra istər Putin, istər Tramp media önünə çıxdılar, bəyanatlar verdilər və heç bir sualı cavablandırmadan oradan ayrıldılar. Bundan əlavə, Rusiyadan gələn heyət üçün nəzərdə tutulmuş nahar da baş tutmadı.
Vladimir Putin faktiki olaraq bəyanatı verdikdən dərhal sonra heyəti də götürüb Alyaskadan ayrıldı. Bütün bunlar ondan xəbər verir ki, Putinlə söhbət çox sərt olub, Tramp onu yetərincə küncə sıxışdırıb və başa salıb ki, indiki şəraitdə razılaşmaya gəlməsə, vəziyyət həddindən artıq pis olacaq. Ona görə də Putin tez-tələsik Alyaskanı tərk etdi. Dünya mediasında bu görüş başqa cür dəyərləndirilə bilir; hətta Putinin Alyaskaya gəlməsini Trampın məğlubiyyəti kimi qiymətləndirənlər var. Bu təbliğatdır. Görünən odur ki, Tramp Putini öz ayağına gətirdi, onu bağlı qapılar arxasında yetərincə sıxışdırdı, eyni zamanda cəmiyyət içində rəzil günə qoydu. Və bütün bunları görən Putin Alyaskadan nahar belə etmədən ayrılmaq məcburiyyətində qaldı”.
Nicat Rüstəmzadə
13:21 16.08.2025
Oxunuş sayı: 11508
