Estoniya nəşrində Azərbaycan Prezidentinin ABŞ-a səfərinin yekunları barədə məqalə dərc edilib
Estoniyanın “Business-M” biznes və informasiya portalında Azərbaycan Prezidenti İlham Əliyevin ABŞ Prezidenti Donald Trampın dəvəti ilə ABŞ-a işgüzar səfərinin yekunlarına həsr olunmuş “Azərbaycan və ABŞ: Strateji tərəfdaşlığın yeni mərhələsi” sərlövhəli məqalə dərc olunub.
Crossmedia.az AZƏRTAC-a istinadən xəbər verir ki, məşhur
onlayn nəşrin materialında Prezident Donald Tramp ilə səfər çərçivəsində
keçirilmiş görüşlər, “Azərbaycan Respublikası ilə Amerika Birləşmiş Ştatları
arasında Strateji Tərəfdaşlıq haqqında Xartiyanın hazırlanması məqsədilə
Strateji İşçi Qrupun yaradılmasına dair Azərbaycan Respublikası Hökuməti ilə
Amerika Birləşmiş Ştatları Hökuməti arasında imzalanmış Anlaşma Memorandumu”
barədə geniş məlumat təqdim olunub.
Nəşr qeyd edir ki, Strateji İşçi Qrupunun yaradılması ikitərəfli
praktiki əməkdaşlığın institusional bazasının yaradılması üçün xüsusi əhəmiyyət
kəsb edir.
Səfər həm də ABŞ Prezidentinin iki ölkə prezidentlərinin
görüşü zamanı Azadlığa Dəstək Aktının 907-ci maddəsinin dayandırılması haqqında
fərmanın imzalaması ilə əlamətdar olub ki, bu da mühüm simvolik əhəmiyyət kəsb
edir.
Azərbaycan Respublikası Prezidentinin ABŞ-a səfəri də Azərbaycan
ilə Ermənistan arasında münasibətlərin normallaşması prosesi kontekstində mühüm
nəticələrlə yadda qalıb. Səfər zamanı Azərbaycan, ABŞ və Ermənistan liderlərinin
zirvə görüşü keçirilib, onun yekunları üzrə Azərbaycan və Ermənistan liderləri,
eləcə də şahid qismində ABŞ Prezidenti Birgə Bəyannamə imzalayıblar. Bundan əlavə,
hər iki ölkənin xarici işlər nazirləri tərəfindən “Azərbaycan Respublikası ilə
Ermənistan Respublikası arasında sülhün və dövlətlərarası münasibətlərin
yaradılması haqqında Saziş”in layihəsi paraflanıb, ATƏT-in Minsk Prosesi və
onunla əlaqəli strukturların bağlanmasına dair ATƏT-in fəaliyyətdə olan sədrinə
birgə müraciət imzalayıblar. Səfər zamanı dövlətimizin başçısı İlham Əliyevin və
ABŞ Prezidentinin xüsusi elçisi Stiv Uitkoffun iştirakı ilə SOCAR ilə
“ExxonMobil” şirkəti arasında “Əməkdaşlıq Memorandumu” imzalanıb. Sənədi Azərbaycanın
iqtisadiyyat naziri Mikayıl Cabbarov və “ExxonMobil” şirkətinin
vitse-prezidenti Con Ardill imzalayıblar.
“Azərbaycan Prezidenti İlham Əliyevin ABŞ-a səfəri iki ölkə
arasında strateji tərəfdaşlığı gücləndirən əsas razılaşmalar gətirib.
Memorandumların və bəyannamələrin imzalanması enerji, təhlükəsizlik və
iqtisadiyyatda yeni perspektivlər açır. İkitərəfli münasibətlərdəki maneələri
aradan qaldıran 907-ci maddənin ləğvi mühüm addım oldu. ABŞ-ın Ermənistanla
apardığı danışıqlar sülh sazişinin imzalanmasını yaxınlaşdırır. ABŞ-ın himayəsi
altında Ermənistanla aparılan danışıqlar sülh sazişinin imzalanmasını yaxınlaşdırdı.
Bu səfər regionun və Azərbaycan-Amerika əlaqələrinin siyasətində tarixi bir mərhələ
oldu”, - deyə Estoniya nəşri qeyd edir.
20:43 13.08.2025
Oxunuş sayı: 1212
