Milli Məclisin vitse-spikeri Musa Qasımlı: “Dünya, həqiqətləri cənab prezidentimizin dilindən eşitdi”
2020-ci ildə əldə olunan tarixi Qələbədən sonra Azərbaycanın beynəlxalq arenada artan nüfuzu və güclənən mövqeyi ölkənin həyata keçirdiyi siyasi, diplomatik və informasiya strategiyalarının uğurundan xəbər verir. Bu baxımdan, III Şuşa Qlobal Media Forumu yalnız bir tədbir deyil, Azərbaycanın haqq səsinin dünyaya çatdırılması baxımından önəmli platformadır. Xüsusilə də, forumun bu dəfə həm də Xankəndidə, Zəfər meydanında keçirilməsi təkcə rəmzi deyil, eyni zamanda siyasi və geosiyasi mesaj daşıyırdı. Dünyanın nüfuzlu media qurumlarının nümayəndələrinin iştirakı, Prezident İlham Əliyevin açıq və səmimi çıxışı, ünvanlanan suallara verdiyi dolğun cavablar, həm yerli, həm də qlobal kontekstdə bu tədbirin əhəmiyyətini qat-qat artırdı. Forum bir daha göstərdi ki, Azərbaycan artıq təkcə regional deyil, qlobal informasiya və əməkdaşlıq mərkəzinə çevrilməkdədir.
Milli Məclisin vitse-spikeri Musa Qasımlı prezident İlham Əliyevin Şuşa Qlobal Media Forumundakı çıxışında toxunduğu önəmli məqamlarla bağlı Crossmedia.az-a açıqlama verib: "III Şuşa Qlobal Media Forumu həm təşkili və iştirakçıları, həm də cənab prezidentimiz İlham Əliyevin suallara cavabları baxımından əhəmiyyət daşıyır. Birincisi, ənənəvi olaraq artıq üçüncü dəfə təşkil edilən bu forumun Xankəndidə, Zəfər meydanında, Konqres mərkəzində keçirilməsi dünyaya təsir baxımından əhəmiyyətli idi. Müxtəlif ölkələrdən ictimai rəyə təsir edən media orqanları rəhbərlərinin və nümayəndələrinin iştirakı Azərbaycana olan marağı göstərir. Dünya, həqiqətləri cənab prezidentimizin dilindən eşitdi. Birincisi orada deyilənlər dünya ölkələrində ictimai rəyə və rəsmi dairələrə təsir edir. İkincisi, cənab prezidentimizin suallara verdiyi cavablar möhtəşəm idi. Burada hər şeydən əvvəl, bütün millətimizi və dünyanı maraqlandıran mühüm bir suala cavab verildi. Azərbaycan öz ərazilərini işğalçılardan azad edib, bundan sonra inkişafı hansı istiqamətə gedəcək? Cənab prezidentimiz bu suala aydın şəkildə cavab verdi. Azərbaycanın inkişafı müasir informasiya texnologiyaları, Azərbaycanın nəqliyyat- kommunikasiya və bağlantılar məkanına çevrilməsi, yaşıl enerji proqramlarını həyata keçirməsidir. Təbii ki, bu istiqamətlər ölkəmizin bütün qurumları qarşısında yeni vəzifələr qoyur.
Bu suallara cavablar içərisində millətimiz və dünya üçün vacib olan Azərbaycanın bağlantı, nəqliyyat kommunikasiya mərkəzlərindən biri olmasıdır. Məlumdur ki, coğrafiya taledir, onu dəyişdirmək olmur. Amma coğrafiyanı həmin ərazidə yaşayan millətin taleyində mühüm rol oynayan amilə çevirmək hər bir dövlət adamına nəsib olmur. Cənab prezidentimiz İlham Əlyevin Azərbaycanın yerləşdiyi həm əlverişli, həm də mürəkkəb coğrafi siyasi məkanı millətimiz və dövlətimiz üçün imkana çevirməsi tarixi hadisə, cənab prezidentimizin millətimiz və bütövlükdə sülh, əməkdaşlıq istəyən bütün dövlətlər və xalqlar qarşısında müstəsna xidmətidir. Şuşa Forumunda Azərbaycan diplomatiyasının nə qədər bacarıqla fəaliyyət göstərdiyini cənab prezidentimiz bir daha dünyaya təqdim etdi. Hesab edirəm ki, dövlət başçımızın söylədiyi, yaxın aylarda daha yaxşı xəbərlər alacağıq fikirləri regionumuzun həyatında böyük dəyişikliklərin baş verəcəyindən xəbər verir. Ən vacib məsələlərdən biri odur ki, Azərbaycan dövləti heç bir zaman öz ərazisindən üçüncü dövlətə qarşı istifadəyə imkan verməyib və hamı ilə bərabər münasibətlər saxlayıb və ya saxlamağa çalışıb. Hesab edirəm ki, üçüncü Şuşa Qlobal Media Forumunda cənab prezidentimiz İlham Əliyevin suallara verdiyi cavablar Azərbaycanın inkişafı, beynəlxalq mövqeyimizin bir daha təqdim edilməsi baxımından olduqca əhəmiyyətli idi".
Ayhan
19:40 21.07.2025
Oxunuş sayı: 3400
