İmamoğluna azadlıqdan məhrum etmə cəzası verildi - Türkiyədə vəziyyət qarışa bilərmi?
İstanbul Böyükşəhər Bələdiyyə Başqanı Əkrəm İmamoğlunun yerli prokuroru təhqir etmək ittihamı ilə 1 il 8 ay müddətinə azadlıqdan məhrum edilməsi Türkiyədə rezonans doğurub. Bu hadisə təkcə hüquqi məsələ kimi deyil, eyni zamanda iqtidarla müxalifət arasında siyasi rəqabətin yeni mərhələyə keçidi kimi dəyərləndirilir. İstanbul kimi strateji bir şəhərdə yaranmış bu böhran ölkənin siyasi gündəminə birbaşa təsir göstərməkdədir.
Məsələ ilə bağlı Crossmedia.az-a danışan Azad Vətən Partiyasının sədri Akif Nağı bildirib ki, Türkiyədə proseslər mürəkkəb xarakter daşıyır və bu, təkcə İmamoğlunun həbsi ilə məhdudlaşmır:
“İmamoğlu həbsdədir. CHP sədri ilə bağlı da təhqiqat işləri aparılır. Ümumiyyətlə, CHP-nin fəaliyyəti ciddi şəkildə yoxlanılır. İmamoğlu müəyyən populyarlıq qazanmışdı, dəstəkçiləri var. Ancaq Türkiyə demokratik bir ölkədir. Hər kəs istədiyi partiyanı dəstəkləyə bilər. Amma bu, həmin partiyanın avtomatik olaraq hakimiyyətə gəlməsi anlamına gəlmir”.
O, qeyd edib ki, Türkiyədə 80 milyondan artıq əhali var və müəyyən qrupların etirazları ümumi siyasi mənzərəni əks etdirmir:
“2 milyon nəfər mitinq keçirsə belə, bu Türkiyənin ümumi iradəsini ifadə etmir. Seçkilər normal keçir və CHP ilə hakim Ədalət və İnkişaf Partiyası – AKP arasında güc balansı çox zaman yaxın olur”.
Akif Nağıya görə, İmamoğlunun həbsi təsadüfi deyil, hakimiyyətin CHP-yə qarşı daha geniş araşdırmalarının bir hissəsidir: “İndiki şəraitdə iqtidar CHP-nin real mövqeyi və fəaliyyəti ilə bağlı məlumatları ictimaiyyətə çatdırmaq qərarına gəlib. Bu isə İmamoğlunun həbsinə qədər gedib çıxıb. Hakimiyyət sonradan faktlarla bu addımı əsaslandırmağa çalışdı. Əgər məhkəmə varsa, istənilən şəxs – hətta prezident belə – cavab verməlidir. Türkiyədə belə hallar olub”.
CHP-nin siyasi xəttinə də toxunan AzVP sədri bildirib ki, bu partiya Qərb yönümlü siyasət yürüdür:
“CHP tam şəkildə Qərb dəyərlərinə üstünlük verir. Milli dəyərlərlə aralarına məsafə qoyublar. Atatürkün adı ilə bağlı olsalar da, indiki CHP o dövrün partiyası deyil. Atatürk bu gün yaşasaydı, bir çox məsələlərə yenidən baxılmasını təklif edərdi”.
Akif Nağı hesab edir ki, İmamoğlunun məhkəmə prosesi seçki dinamikasına təsir göstərə bilər:
“Bu hadisə həm müsbət, həm mənfi təsir göstərə bilər. İnsan psixologiyasında belə bir hal var ki, təzyiqə məruz qalan şəxsə qarşı rəğbət yarana bilər. Amma eyni zamanda faktlar da var və bunlar prosesə təsir edir”.
Türkiyədəki sosial-iqtisadi vəziyyətin mürəkkəbliyini də qeyd edən A.Nağı, AKP-yə hələ də ciddi dəstəyin olduğunu vurğulayıb:
“İqtisadi çətinliklər var, amma AKP-yə də böyük rəğbət mövcuddur. Onlar ciddi açılımlar edirlər. Xüsusən PKK ilə bağlı atdıqları addımlar, terrorla mübarizədəki fəaliyyəti cəmiyyət tərəfindən müsbət qarşılanır”.
Sonda Akif Nağı qeyd edib ki, seçkilərin nəticəsini öncədən proqnozlaşdırmaq çətindir, lakin onun şəxsi arzusu AKP-nin siyasi xəttinin davam etməsidir:
“Ərdoğan və ya onun varislərinin apardığı xəttin davam etməsini arzulayıram. Həm parlament, həm yerli, həm də prezident seçkilərində bu siyasətin qalib gəlməsi Türkiyənin sabitliyi üçün vacibdir. CHP qalib gəlsə belə, bu ölkənin istiqamətini dəyişməyəcək. Çünki Türkiyə cəmiyyəti formalaşıb və onu yanlış yola aparmaq asan deyil”.
Mehriban Yariyeva
19:22 16.07.2025
Oxunuş sayı: 968
