"Onların məqsədi öz limanlarına zəncirlənmiş Türkiyə idi" - AÇIQLAMA
Bu gün, 2015-ci ildə Türkiyədə həyata keçirilən uğursuz dövlət çevrilişindən 10 il keçir. Terror təşkilatı olan FETÖ, qlobal imperialist dairələrin Türkiyə üzərindəki planlarının əsas alətlərindən biri olmuşdur. Din, təhsil və mədəniyyət maskası altında fəaliyyət göstərən bu şəbəkə, Türkiyədə o cümlədən dünyanın müxtəlif bölgələrində məktəblər və şirkətlər quraraq geniş bir təsir sahəsi yaradıb. Əsas məqsəd Türkiyəni zəiflətmək, onu xarici güclərə tabe etdirmək idi. Bu məkrli məqsədlərin ən açıq təzahürü isə 15 iyulda baş verən uğursuz çevriliş cəhdi ilə üzə çıxdı. Türk xalqının birliyi, cəsarəti, düşmən qarşısındakı bütöv iradəsi bu çevrilişi dəf etdi. Baş verən bu hadisədən sonra Azərbaycan prezidenti İlham Əliyev də öz dəstəyini, xalqımızın hər zaman türk xalqının yanında olduğunu elan etmişdir.
Mövzu ilə bağlı Türk İslam Araşdırmalar Mərkəzinin sədri Telman Nüsrətoğlu Crossmedia.az-a açıqlama verib:
“FETÖ şəbəkəsini imperialist dairələrin Türkiyəyə və dünya ilə bağlı hesabları çərçivəsində dəyərləndirmək lazımdır. Bu, qlobal hədəfləri olan bir şəbəkə idi. Onlar dünyanın müxtəlif yerlərində məktəblər açır, şirkətlər qururdular. Bu şəbəkə təhsil mərkəzli bir təşkilatlanma olub. “Türk” adı altında Afrikadan Asiyaya qədər qlobal imperialist qüvvələrə xidmət edən bir ad və şəbəkə kimi formalaşdı. Əsas hədəflərindən biri Türkiyəni istədikləri kimi idarə edə bilmək idi. Onların arzusu öz limanlarına zəncirlənmiş bir Türkiyə idi. Ərdoğanın iqtidara gəlməsindən sonra Türkiyənin xarici siyasətdə daha sərbəst hərəkət etməsi müəyyən narahatlıq yaratdı. Buna görə ard-arda Türkiyəyə qarşı terror hadisələri həyata keçirdilər. Ən nəhayətində isə 15 iyulda xain dövlət çevrilişi cəhdi oldu. Dövlətin bütün sağlam təbəqələri, ordunun və təhlükəsizlik qüvvələrinin sağlam hissələri millətlə birlikdə hərəkət edərək, bütöv bir iradə ortaya qoydu və bu oyunu pozdu. Buradakı əsas hədəflərdən biri Ərdoğan idi. Ərdoğanı iqtidardan devirməyə çalışdılar. Amma Ərdoğan çətin situasiyaların lideri olduğunu göstərdi. Təsadüfi deyil ki, bu xain çevriliş cəhdindən sonra türk ordusu daha da gücləndi. Suriyanın şimalında terror dövləti qurmağı hədəfləyən qruplaşmaları məhv etdi və bundan sonra da baş verən pozucu terror qruplarına qarşı çox uğurlu əməliyyatlar həyata keçirdi. FETÖ və onun arxasındakı qüvvələr Türkiyədə həmçinin vətəndaş çevrilişinə də cəhd etdilər. Lakin türk xalqının birliyi və bütövlüyü bu xain planı da puça çıxardı”.
Ayhan
11:50 15.07.2025
Oxunuş sayı: 12423
